側田新歌《爽》MV 大玩頽頭大肚腩 (附圖輯)


側田日前在紅館個唱上,首播新歌《爽》的MV預告篇,短短幾十秒的片段掀起全場哄動尖叫聲,事關因為歌詞側田自嘲又矮又光頭之外,MV時造型更將自己徹底玩到盡,九一分界頽頭兼大肚腩,韓籍女友亦被拉落水客串「包租婆」。至於預告篇中保持神秘,在鏡頭前只騷肌肉背影的「天鵝男」是誰呢? 登登登櫈, 謎底終於解開,他就是「女仔見到會尖叫」的型男Daniel Wu,吳彥祖 !

入行八年的側田為新歌博到盡,更破天荒「麻甩look」犧牲色相,他說:「首歌充滿正能量,歌詞係講做人只要有自信,踏到舞台個個都可以係巨星。因為今次演唱會蘇老闆(草蜢的蘇志威)贊助好靚既西裝,我好努力節食減肥先至可以著得到,但為咗MV前功盡廢,增磅狂食谷大肚腩,所以拍完MV我又要繼續地獄式減肥,呢幾日來回天堂與地獄!」不過這是很值得,事關側田認真地鞭策自己,誠意打動了圈中多位扮嘢高手參與演出,而且他們悉心設計,由造型到演出都令人拍爛手掌。

首先是「扮嘢達人」72歲盧海鵬上台「試咪」和耍拳,然後是81歲「舞王修」胡楓上台獻舞和打鼓,他們身手靈活,都一take過搞掂。緊接是「港版PSY」錢國偉大跳《江南style》招牌甫士,還拉埋側田個唱肥佬鼓手Chris反串重量級Sexy Lady齊跳辣身舞,抵死舞步令人拍案叫絕。而《爽》填詞人陳詠謙亦加入扮嘢團,他以電影《食神》的「醬爆look」表演穿崩魔術,然後他身後國際級大英雄Batman出場,原來他是搞笑高手劉以達,逹哥出動私伙Batman衫撐側田,還即場演釋他的經典電影對白:「大夫~」

至於壓軸出場,全場最大驚喜,吳彥祖!一身結實肌肉的Daniel竟以可愛又雪白的「天鵝湖」造型現身,穿上吊帶背心配芭蕾舞小傘裙,認真地嘗試以不同舞步出場,然後又搞笑扮MJ玩自摸,又大鵬展翅在舞台上跳來跳去,表現興奮。他更自爆已拍照留念,要讓囡囡Raven長大後欣賞爸爸的瘋狂造型。

新歌MV星光熠熠,側田好感動,他說:「好開心有咁多朋友嚟撐我既新歌MV,鵬哥和修哥係我偶像,我托咗好多朋友先至邀請到佢哋參與演出,非常榮幸,剛才後台化妝間鵬哥仲過咗兩招扮嘢心得畀我,佢又講咗好多當年喺EYT做直播既趣事。當然最驚喜係Daniel表演芭蕾舞啦!因為我首歌裏面有一句歌詞提到佢個名Daniel Wu,於是我就膽粗粗打電話邀請佢,最初我請佢嚟好似平時咁,有型靚仔咁出場,點知佢話要同我哋一齊扭seafood,玩盡啲,真係估佢唔到,好驚喜。咁多朋友錫我,真係好開心,今晚要打電話同媽咪分享!」在旁的吳彥祖笑說:「你好叻仔,喺首歌加咗我個名,叫我點可以唔嚟玩?!其實我好多年無拍人哋MV,而且入行17年未試過呢個造型,好開心,我都要打電話同屋企人分享。原來呢個look令我好舒服喎,估唔到拍MV搵到真我!」側田亦表示好享受自己這個「麻甩look」,不排除從此以這個look示人,不過身旁的女友似乎並不欣賞,立即反白眼以國語對側田裝作認真地說:「分手吧!」全場爆笑。

浩楠

Stars-hk 創辦人, 希望建立一個只談專業, 不談八卦的娛樂資訊網站。