橫掃各大流行樂壇頒獎禮組合大獎的RubberBand，正式宣布加盟寰亞大家庭，四位成員：隊長兼結他手馮庭正（阿正）、主音繆浩昌（6號）、鼓手黎萬宏（泥鯭）和低音結他手李兆偉（阿偉）齊聲表示非常興奮，並期待與寰亞攜手開展他們在樂壇的新章節，再創高峰。
RubberBand加盟寰亞唱片及經理人部門，全方位開拓亞洲市場，隊長兼結他手阿正說：「眼見『舊同事』楊千嬅和側田喺寰亞發展得好好，成功打開內地市場，我地都好想步佢地後塵，希望到內地和台灣發展。而且公司有好多我哋既偶像藝人和創作人，好想同佢哋合作，我哋對加盟新公司充滿希望，非常興奮。」加盟後，RubberBand第一擊將現身恩師雷頌德（Mark）的《THANK YOU演唱會》擔任表演嘉賓，鼓手泥鯭自爆出騷另有目的，他說：「我哋除咗好期待喺師傅Mark既紅館騷演出，其實我哋最期望親眼見證Mark和馮德倫重組Dry，我哋細個就好鍾意Dry，因為Mark和馮德倫好有型，我哋以前夾Band個個都模仿佢哋Chok住Rock！」
為了新發展，RubberBand四子都積極備戰，阿正說：「我即將開始遊歷之旅，希望增廣見聞，刺激創作靈感。」而隊中身兼主音、填詞和導演MV的6號，已開始學普通話和西班牙語自我增值，他說：「我希望填國語歌詞，所以學好普通話。而西班牙係一個非常浪漫地方，我希望除咗去旅行，仲學埋西班牙語，感染多啲浪漫情懷，為RubberBand寫多啲冧歌和拍多啲浪漫MV。」工作狂的他還主動為樂隊接廣告和電影等等幕前演出，他笑說：「點可以畀泥鯭一個搶晒風頭架？其實我哋三個都好有演藝天份架！」鼓手泥鯭雖然加盟寰亞後工作量大增，但他會繼續拍戲和做義工，他說：「我一向都坐唔定，做外展義工不但幫到人，仲可以接觸更多人和事，對處事和工作都好有幫助。」低音結他手阿偉則透露：「秉承RubberBand『傳統』，專輯名會順英文字母排序，即係F字頭，例如family（家庭）或者friends（朋友），但仲未決定，所以要先賣關子。」
