「香港壽臣山獅子會」籌辦《無毒一生，燦爛人生2025》全港青少年造型設計比賽 Kellyjackie獻唱 曹敏寶一家總動員支持 邱芷微演繹著名設計師張路路時裝

由「香港壽臣山獅子會」籌辦的《無毒一生，燦爛人生2025》全港青少年造型設計比賽，日前圓滿舉行，參賽學生設計師作品出色，並有成功透過服裝造型，宣揚青少年禁毒及健康校園的信息。大會更邀請Kellyjackie擔任「禁毒大使」，兩位「愛心大使」曹敏寶（Mable）及邱芷微（Chelffy）亦有現身支持，Kellyjackie和曹敏寶擔任表演嘉賓獻唱，邱芷微親自演繹著名時裝設計師Lulu Cheung張路路服裝。

Kellyjackie曾患抑鬱症學懂主動關心身邊人

Kellyjackie在現場除了演唱名曲《他約我去迪士尼》外，還有禁毒歌曲《不可一不可再》，她坦承由2009年第一屆開始，已連續16年擔任「禁毒大使」，心情確實帶點矛盾，「雖然我有首禁毒歌《不可一不可再》，但成日都希望有朝一日唔需要再唱呢首禁毒歌，因為社會唔再需要禁毒，大家已經遠離毒品。」出任了多年「禁毒大使」，她認為現在宣傳工作更困難，絕對不可以鬆懈，「現在太多科技，年青人要接觸毒品溝道，容易過以前好多，可以好隱閉去做，所以人與人之間，更加要行多一步，多點關心身邊人，因為吸食咗毒品的副作用都好明顯，見到身邊人有異樣就要關心吓。」年前曾患抑鬱症的Kellyjackie，更加明白身心靈健康的重要性，「自己係過來人，一句鼓勵說話可能會幫助好大，嗰份暖意可能會令人醒一醒，當然係需要尋求專業人士協助，但適切的關心都同樣重要，所以我建立咗個YouTube Channel 『Twinkie Star Whispers星語夢之聲』，希望大家好簡單咁聽吓歌，像和小朋友傾偈一樣。」

曹敏寶擔心下一代易接觸毒品 要從小教育仔女勿亂食葯

曹敏寶全家來支持，作為分別6歲的囝囝和3歲囡囡的媽咪，看到近期吸食毒品的年紀愈來愈細，感到相當擔心，「作為家長真係好驚，我有個姪女都係得12、3歲，佢話都見到有好多朋友吸太空油毒品，首先唔知佢哋點解會買到，最擔心係佢哋太細個，根本唔知道禍害嘅層面，呢個責任就要交返畀大人，其實小朋友咁做離不開攞注意力，同埋就係冇抒發情緒嘅窗口，所以大人要主動去關注，同佢哋多啲傾偈了解有咩心事，面對緊咩困難，我成日講係用愛去浸大啲仔女，令佢哋唔敢做嘢傷害父母嘅事，諗起阿媽咁樣會傷心，佢哋就唔會做啦！」由於Mable一對子女年紀太小，更加要因材施教，對症下藥，「我會好簡單咁同佢哋解釋，有啲藥係好，幫到人醫病，但有啲藥係害人，令人更加病，所以有任何人叫佢哋食啲唔熟識嘅嘢，就要話畀媽咪聽，等佢哋有個安全意識先，我個仔開始懂事，佢又好貪靚，又鍾意做Super Hero，我就會話畀佢聽亂食嘢會做唔到Super Hero，飛唔到上天佢就會好驚。」

邱芷微英國升讀大學 曾被同學引誘食軟性毒品

邱芷微(賈名媛) 當日興奮獲LuLu Cheung挑選穿上對方設計服裝現身，「套衫好閃，我專登襯埋其他閃閃鞋同飾物出嚟，如果吸毒就會冇晒儀態，仲點着到咁靚嘅衫呀！」

她提到以前在英國升讀布萊頓大學（University of Brighton）時，住在大學宿舍，當時已見識到吸毒禍害，「嗰時每逢周末室友好鍾意帶埋其他朋友嚟玩，佢哋喺廚房食煙，甚至食埋大麻，啲味真係好難聞，我喺房隔住都會聞到，有啲室友就搖住頭咁開完party返嚟，仲會搞到間房好污糟，宿舍廚房係共用，但會擺自己廚具喺度，最嬲有次室友攞咗我個煎plan放咗啲不知明好臭嘅嘢，搞到我即刻掉咗唔敢再用，好冇公德心。」Chelffy當時仲試過被引誘過食軟性毒品，慶幸自己膽小最終沒嘗試，「有時跟同學去酒吧消遣，有人會攞啲不同來歷嘅藥丸出嚟，都有問我試唔試食？我個人好鬼怕死，所以冇試過，但有啲同學有食，之後就迷幻晒咁，個個瞓晒喺度好似死屍一樣，搞到酒吧打烊都未醒，結果我要同另一個冇食嘅同學，逐個抬佢哋出去，之後個個仲斷晒片，我見到佢哋咁嘅樣冇晒儀態，我仲點會敢去試食。」