連家穎首次與爸爸挑戰10K慈善跑 感幸福 長跑注入足球訓練 加瞓不加操成功告別舊患

寰亞「長腿師妹」連家穎（Vian）上周末（11/4）參與國際培幼會舉辦「『愛·女孩』起跑！2026」慈善跑活動，見證爸爸完成10公里比賽，感到好幸福。

「我今日嘅目標係1小時05分內完成，好開心，結果只係用咗58分鐘，同今年初『渣馬』成績差唔多。之前參加足球比賽有上戰場嘅感覺，但今日嚟到跑道，心情輕鬆好多。」田徑女將Vian透露化身「白老鼠」，實驗以足球訓練融入跑步，結果令她驚喜，不但保持成績，連舊患痛楚都拜拜！她說：「因為我好好奇，足球練習對長跑有冇幫助？今日終於驗證咗，『肌耐力』同『氣』都有好大幫助，以前跑到3、4K舊患開始痛，今日跑完10K都冇事！」Vian笑言「策略」是「瘋狂睡眠」，她說：「足球比賽後呢一個星期盡情瞓覺，畀身體同肌肉有足夠放鬆，無加操有『加瞓』！」

告別舊患痛楚當然開心，但令Vian最興奮和難忘，是首次與爸爸一齊參加10K跑，她說：「我同自己講，今日我就算攰都唔可以展露出嚟，要不斷同佢打氣，佢攰就陪佢行吓，成為佢嘅『領導者』！」Vian開心見證爸爸第一次完成10K比賽，說：「以前見佢落街跑1、2K都有啲吃力，今日竟然完成到10倍距離，仲要笑住完成，我覺得好幸福、好特別！」她期待明年與爸爸一齊參加馬拉松賽跑。