Honey Punch搭電梯撞見姐姐蔡蕙琪（葵芳）拍完MV 即刻合體跳舞

黃偉文X伍樂城聯手打造Honey Punch全新主打歌《樓上的姐姐》，MV 邀請咗近期人氣急升嘅Kay蔡蕙琪（葵芳）特別演出，化身神秘鄰家姐姐。Honey Punch 一出道就給粉絲認為係最甜最跳得嘅六人女團， 六位女生（Casey、Jacey、Chelsa、Colour、Alma、Keira) 2026年第一首主打歌《樓上的姐姐》由詞神黃偉文同著名作曲人伍樂城親自為佢哋度身打造，伍樂城包辦作曲、編曲同監製，黃偉文則用一貫細膩嘅筆觸，寫盡少女遠觀大人情感世界嘅好奇與青澀。

歌詞以幾位「小妹妹」視角出發，探究Kay蔡蕙琪一人飾演的兩角，呢位憑電影《夜王》入屋嘅「葵芳」姐姐，今次褪去濃妝艷抹，化身鄰家大姐姐，眼神一轉就帶住複雜又好有故事嘅感覺，响寫實及超現實拍攝手法下，分別飾演嚎哭失戀姐姐及瀟灑失戀姐姐，非常專業地投入歌曲裡面嘅角色，演技爆燈，真係一位新一代的實力派女演員！。

黃偉文笑言：「嘩，幾多年冇再做過？ 《多謝失戀》《下一站天后》嘅初戀感重新開動。」

伍樂城補充：「同Wyman (黃偉文) 合作，永遠對我嚟講都係最高嘅期待值！

另外，Honey Punch 六位妹妹响出道短短8個月後，再次拍MV已經有明顯進步，表現聰明，加上 Kay(蔡蕙琪)嘅精湛演技，我好滿意MV 裡呈現 Honey Punch 同 Kay出嚟嘅強烈對比效果。」

Honey Punch 隊長Casey ：「今次首歌其實好表達到我心裏面嘅感受，又想像拍拖嘅感覺但係又驚，到我哋正式聽到首歌嘅時候就好似有一個答覆咁！另外最驚喜係Wyman哥哥同Kay姐姐都有share我地既MV,真係好似發夢咁。」

其他成員則表示：「今次好開心同kay姐姐有拍攝嘅機會，而且仲可以同佢一齊拍跳舞reels，拍慢歌嘅MV 感覺成件事好似拍緊套戲咁。我哋每個人嘅solo part都影得超靚，另外見到Kay姐姐喺個mv做戲真係好勁好專業，見到佢喊嗰陣時自己都會俾佢觸動到，同埋首歌好代表到我哋會諗嘅嘢，因為有時見到第二啲人嘅戀愛經歷都可能會有啲驚同埋疑惑。」