雲浩影Cloud化身一日「麵包精靈」 登昂坪360整三文治迎復活節 體驗「生命麵包纜車」置身空中麵包袋：成個童年返晒嚟！

適逢昂坪360踏入 20歲，兩大經典陪伴香港人成長的品牌聯手，攜手將昂坪纜車及昂坪市集變身港式情懷的「高空」熱點！今日昂坪360特別邀請人氣女歌手雲浩影Cloud擔任「星級體驗官」，登上昂坪市集為「昂坪360 x 嘉頓 春日滋味派對」揭開序幕。

率先試坐「生命麵包纜車」　爆笑自爆：好似俾人塞入麵包袋！

活動當日，Cloud以一身春日活力造型現身，興奮到跳跳紮，急不及待登上全新登場的「生命麵包纜車」，成為第一位體驗主題車廂的幸運兒：「一上車我『嘩』咗一聲！成個車廂都係經典藍白格仔！連窗口都有生命麵包圖案，好似走咗入個巨型麵包袋入面咁！」Cloud忍唔住爆笑話：「好似成個人俾人『塞』入個麵包袋入面咁，但係呢個袋會飛㗎，感覺好奇妙啊！」

纜車沿途，Cloud望住窗外嘅自然美景，再望返車廂內嘅懷舊設計，回憶即刻返晒嚟：「細個去旅行、去郊遊，阿媽一定會放幾塊生命麵包落我書包做『能量補給品』。而家坐喺呢架纜車入面，由高空望住下面嘅山景，真係好想即刻喺草地野餐——用生命麵包蘸牛奶，係天下間最幸福嘅味道！」

終極二選一：愛情 vs 麵包？神回冧爆全場

活動上，Cloud更接受主持的快問快答挑戰，其中最受注目的問題便是千古難題「愛情還是麵包？」。Cloud想都無想，綻放出招牌燦爛笑容說：「小朋友先做選擇，我覺得兩樣都好重要！麵包可以帶嚟即時幸福感，而愛情──包括現場所有朋友粉絲嘅愛──就令我嘅人生更加完整！」這個將粉絲的愛也納入「愛情」範疇的神回覆，即時引爆全場尖叫歡呼，粉絲們紛紛高呼「被融化」，現場氣氛瞬間升溫！

今年適逢昂坪360和嘉頓雙雙迎來重要周年，Cloud表示很開心可以參與今次別具意義的合作，她說：「兩個都是陪伴很多香港人成長嘅標誌，嘉頓麵包同餅乾由細食到大，昂坪360亦係同屋企人朋友假日必去嘅地方。能夠喺呢個場合見證兩個經典品牌嘅重要時刻，感覺特別有意思。」

化身一日「麵包女神」整三文治　親民逐個冧粉絲

除了分享生活趣事，Cloud亦落手落腳，與粉絲一同參與「整三文治」互動環節。她親自示範簡單三文治做法，與粉絲合力完成獨一無二的三文治。過程中Cloud零架子，不時主動與粉絲交流，例如笑問對方平時最喜歡吃甚麼麵包，令現場氣氛更為輕鬆。

完成三文治後，Cloud更貼心與粉絲一起拍照留念，搞到不少粉絲在活動後仍依依不捨，揮手及大聲支持，現場更不時傳出歡呼聲，場面溫馨又熱鬧，為整個活動增添不少歡樂氣氛！

萬花筒鏡影到唔捨得走　仲秘密拍咗兩條片？

Cloud亦到昂坪市集的嘉頓什餅、香葱薄餅主題裝置瘋狂「打卡」，為「昂坪360 x 嘉頓 春日滋味派對」造勢！說到最喜愛的「打卡位」，Cloud說必定是4米高嘅巨型復活蛋——以嘉頓生命麵包經典藍白格仔包裝設計，仲配上一對萌萌的兔子耳朵，可愛到犯規！Cloud在巨型復活蛋入面萬花筒鏡子不斷拍照：「入面好夢幻，周圍都係我嘅影，唔捨得出返嚟啊！」打卡打到忘形之際，Cloud仲忍不住「劇透」：「其實今日仲秘密拍咗兩條片，想知我做咩？記住留意昂坪360嘅社交平台，保證有驚喜！」

由昂坪360與嘉頓攜手打造的「昂坪360 x 嘉頓 春日滋味派對」，將於2026年3月25日至5月10日期間舉行，邀請賓客在昂坪纜車及昂坪市集展開充滿驚喜與美味的雲端尋蛋之旅。