《夜王》 「慶祝V姐榮升東日老闆娘大派對」盛大舉行 票房衝破8600萬

衷心感謝各位老闆賞面光臨，馬年賀歲片霸《夜王》愈映愈旺，票房已突破8600萬大關，V姐終於成功逆襲，夠錢買返東日！今日（8號）特別舉行「慶祝V姐榮升東日老闆娘大派對」，鄭秀文（Sammi）首次加入《夜王》謝票團隊，聯同導演吳煒倫、何啟華（阿Dee）、李芯駖、林熙彤（Hazel）、趙君瑜親臨戲院答謝老闆們賞面捧場，期望《夜王》繼續客似雲來，衝破億萬大關指日可待！

為恭賀《夜王》票房衝破8600萬，V姐榮升東日老闆娘，今日特別準備8000萬大支票，讓Sammi即場簽名，正式接管東日，同時Sammi更與吳煒倫導演、阿Dee、李芯駖、林熙彤、趙君瑜一起切蛋糕慶祝，Sammi笑言：「多謝大家好盡力去拯救東日，但其實我哋仲欠落好多街數，好似借咗40萬俾葵芳，仲有好多私底下借咗俾啲小姐，大家又唔知，手頭都好緊，希望大家繼續支持《夜王》！」有現場觀眾悉心打扮以V姐造型亮相，其中一位更是專程從重慶而來的男粉絲，逗得Sammi開懷大樂：「我覺得真係誠意可嘉，有一個仲係喺重慶飛落嚟，嗰個男仔又戴晒假髮，好有誠意，呢份支持嘅心意令我相當感動！」

阿Dee、芯駖、Hazel、趙君瑜今日亦有在造型上向V姐致敬，結果芯駖憑露臍性感打扮獲Sammi投以神聖一票，同時Sammi更親自動手，幫導演及幾位演員點上最具代表性的「V姐癦」，Sammi說：「男士嗰兩粒就特別有埋毛嘅！其實好開心呢部戲，每一個角色都俾觀眾留低好深印象，大家都想追問唔同角色嘅故事，好想藉住呢個機會多謝導演！」阿Dee笑指獲Sammi加持「發財毛」，寓意《夜王》愈映愈發！

謝票現場，有觀眾問到Sammi會否在啟德舉行演唱會，更揚言「開幾多場睇幾多場」，Sammi並沒有正面確認：「唔使儲錢（睇演唱會）住，睇咗《夜王》先啦！（假設落實開騷，會唔會邀請《夜王》兄弟姊妹做嘉賓？）梗係開心啦！如果真係（開騷），可以請芯駖跳舞、Ace哥（阿Dee）rap，各位兄弟姊妹一齊上台，everyone is a super Star！我覺得導演揀《星秀傳說》，好似冥冥之中，啲歌詞好吻合我哋而家發生緊嘅事，其實都幾感動！」導演透露《夜王》原聲大碟正在趕製中，「等一等，好快會出現！」