龔柯允推出全新單曲《岩石的形成》唱出傷痛、堅強與饒恕的旅程

馬來西亞駐香港歌手 Karen Kong 龔柯允，繼《Don’t Wanna Move》、《Light》、《人設崩壞》及《原諒有用》後，正式推出廣東話 EP 六部曲嘅第五章——全新單曲《岩石的形成》。歌曲以大海與岩石作為隱喻，唱出在人生波浪一次又一次拍擊下，心靈如何被打磨、裂開、甚至重塑。

️ 錄音室內的眼淚

歌曲由 Karen 親自作曲，詞人高皓正填詞，Johnny Yim 編曲，劉港源監製。Karen 坦言錄音期間，因為親密關係遇上挫折，心痛到無法自控。「唱到一半，無數次爆喊，因為覺得維繫一段深嘅關係真係好難，錄音時好似傷口被海浪一次次拍擊。」呢份真實情感，令歌曲每一個字都帶住傷痕與掙扎。

MV墨爾本取景：險被風吹跌岩石

《岩石的形成》Visualizer 特別遠赴澳洲墨爾本取景，走到燈塔與海邊岩石拍攝。Karen 笑言拍攝過程「幾乎成為真嘅生死挑戰」——「企喺岩石上，風大到感覺自己就快跌落去，落唔返嚟，好彩最後老公即刻衝上嚟救我！」意外插曲，反而與歌曲主題「堅壯與不倒」遙相呼應。

從傷痛到饒恕：黑暗中的陪伴

Karen 分享，《岩石的形成》唔止關於痛苦，更加關於學習饒恕。「有時候堅強好似一種懲罰，明明好攰，仲要硬撐；明明受傷，仲要笑住行落去。但原來真正嘅堅強，唔係麻木，而係學識放下、甚至選擇饒恕。」她希望透過呢首歌，陪伴喺黑暗中掙扎嘅聽眾——無論係關係破裂、持續被傷害，或係傷痕纏身嘅人——都可以重新搵到光同希望。

EP六部曲走向尾聲

《岩石的形成》作為 EP 嘅第五章，延續 Karen 對「原諒與饒恕」嘅主題探索。Karen 直言希望自己嘅音樂唔只係娛樂，而係能夠成為陪伴香港人心靈嘅歌聲，在這個黑暗時代，為人帶來神的盼望。