陳慧琳尾場淚灑紅館 草蜢合體炸爆舞台《陳慧琳Season 2萬人結界演唱會》

由渣打優先理財及財富方案冠名贊助、Star Talent Limited主辦的《陳慧琳Season 2萬人結界演唱會》昨晚於紅館演出尾場，十場演唱會圓滿結束。陳慧琳Kelly滿面不捨，看着台下熱情的歌迷多次灑淚。尾場驚喜連連，先是經典組合Dry再次合體，馮德倫驚喜現身與舊拍檔雷頌德，連同Kelly合唱《紀念日》。緊接再有草蜢擔任嘉賓，與Kelly又唱又跳，今次更是蔡一傑病癒後首度回歸舞台，狀態大勇，全晚歡呼聲響徹紅館。

上周日因颱風襲港，Kelly演唱會被迫延至昨晚補場。觀眾因禍得福，與Kelly共度今次演唱會尾場。轉眼來到最後一場，Kelly特別感觸，當在台上多謝幕後團隊時，已忍不住眼泛淚光。到兩邊天橋升起，她看着台下熱情的歌迷，終忍不住落淚說：「唔知我哋下次幾時先再見，係咪十年後，你哋都仲會嚟睇我嗎？」歌迷齊聲高呼：「會呀！」Kelly笑說：「你哋睇，咁我繼續唱啦！」

昨晚在Kelly與雷頌德、豹哥單立文、Joey Tang合唱《紀念日》的環節時，原主唱之一馮德倫驚喜現身，歌迷歡呼聲震撼紅館，不單是組合Dry重現舞台，更是《紀念日》三位主唱難得重聚的一次。雷頌德望着Kelly說：「證明呢個世界有平行時空，隔咗咁多年我同Stephen鬚都白埋，但中間嗰個依然冇變。」上一次《紀念日》齊腳是2013年，轉眼已相隔十二年。Stephen表示不知演唱會因颱風延期，並笑說：「我前晚係諗住問阿Mark出唔出嚟飲咖啡，結果佢淨係叫我嚟做嘢，冇覆我飲唔飲咖啡。」台下歌迷高呼叫他們多些合體，Mark說：「我退咗休。不如講下我哋點解散，我哋嗰時好多嘢做，但冇賺過錢，因為冇商演。賺得最多係Fans送嘅公仔。」豹哥聞言笑說：「你哋叫Dry梗係冇錢啦！」Kelly說：「網民話你哋年紀大咗，可以叫Dry Martini。」Stephen笑說：「咁我咪要叫Stephen Yoshi，會型啲。」Kelly立即指住Stephen心口：「人哋露點㗎！冇露就唔係Yoshi。」在旁的Mark一臉茫然問：「Yoshi咩嚟，我唔識。我真係退出咗。」Steven笑說：「你返去玩馬啦！我仲係好trendy。」場面搞笑。

尾場終極嘉賓是已有近一年沒合體的草蜢，他們狀態大勇，與Kelly合唱《熱力節拍wou bom ba》、《打開天空》，氣氛高漲。今次更是傑仔在腦腫瘤手術後首次回歸舞台，也是草蜢與Kelly相隔十年再同台。

Kelly與草蜢昨晚齊穿上白色舞台服，相當合襯。Kelly笑說：「我哋似唔似結婚呀？我好想有三個老公。」傑仔很感謝Kelly，在他手術後公佈消息，Kelly是第一個發訊息給他，擔心他之餘，又為他在頭上開這麼大條疤感到心痛，並祝福他快點康復，亦不斷鼓勵他，更讚他光頭都好型仔。傑仔說：「Kelly喺圈中人緣好好，由她出道開始一直睇住佢大，好努力工作，不論拍戲、做演唱會都做得好好，但有一樣係更好。佢個人由以前到而家都冇變過，都係真誠對人，好善心。佢係好錫朋友又錫歌迷嘅beautiful lady。」草蜢更帶來剛做好三天的新歌《老的辣》，首度公開獻唱，並宣佈明年四月於紅館開騷。

尾場Kelly不捨，fans一樣不捨，完騷後大叫encore，成功召喚Kelly再上台，Kelly說：「全部都唔走喎！好齊心喎！我剩返半條人命都搵我出嚟！我搵咗首好耐冇唱嘅歌。」然後唱出2000年推出的《假天真》，全場觀眾在副歌部分一起大合唱，Kelly最後再唱《飛天舞會》一曲後，與歌迷最後道別，並約定大家8月16日廣州站見。