鼓勵大眾到店體驗「防騙互動區」 袋穩貼士遠離電騙「呃」運 周嘉洛出席渣打「防騙便利店」開幕禮

科技進步日新月異加上人工智能普及化，一通電話、一個短訊，分分鐘呃走你成副身家！渣打銀行繼去年辦以茶樓為主題的防騙宣傳後，今年再開設期間限定「防騙便利店」，邀來本地人氣插畫角色「大麻成」驚喜聯乘，市民可於三大特色互動體驗區玩模擬遊戲，學習多元防騙知識之餘，更可以免費換領限定禮品。渣打「防騙便利店」現已於又一城LG2正式「開張」，由即日起營業期至7月20日，周家洛日前亦親臨店內打卡，分享他的獨門防騙資訊！

香港人向來醒目，一早對「猜猜我是誰」的電話騙局有所提防，但是騙徒手法層出不窮，如假扮「藝人」、利用「收件短訊」奪取個人資料，利用科技令騙局更加疑幻似真！連續兩年獲邀出席活動的周嘉洛今次首任一日店長，他笑謂自己經常巡舖，對防騙商品瞭如指掌，更指店內三大防騙互動區域及每件商品都非常出色：「例如杯麵區嘅Deepfake偽人有伏味，唔係「藝人」，係「偽人」啊！平時成日話有片有真相，但騙徒可以用Deepfake技術冒充股神，甚至你嘅家人，所以最緊要係保持冷靜，同當事人查證，唔好有片就信咗先！」他更親身體驗三大防騙互動區後，大讚設計好玩又過癮：「明顯感覺到幕後團隊好用心設計，每樣商品都能夠簡單明確提醒受眾一啲防騙要點，容易入口容易記。」他最喜歡「投資切忌耳仔軟糖」及「投資邊有贏硬糖」，直言比較適合現階段的自己：「自己唔係特別聰明，所以便利店嘅商品幫到手！」同時，體驗區亦可以教育大眾遠離電騙「呃」運，每個設計都極具心思又有意義，更鼓勵大眾到店體驗兼打卡。

周嘉洛自爆差點被收數公司成功騙財，幸好當時記得保持冷靜，才能力保不失：「啲騙徒善於捕捉受騙者嘅心理，通常會喺緊迫情況下逼你做決定，甚至會令你擔心埋屋企人。好好彩，喺騙徒嘅對話入面留意到破綻，最後保得住自己荷包。」問到小時候可有被騙或騙人經歷？他笑謂兒時曾欺騙父母：「細個唔識諗，為咗可以參加課外活動，冒媽咪簽名。睇落好似好小事，但係結果當然係得不償失啦，做錯事係要負責任嘅！」

對於有騙徒假扮藝人呃錢，周嘉洛坦言自己亦是受害者：「身邊有唔少藝人朋友試過，畀人hack入社交平台帳戶同埋點數卡嗰啲，大家都好醒目唔會信㗎啦，但係利用Fans對藝人嘅支持呃錢，真係好嬲！我係絕對唔會私訊Fans攞錢嘅，大家唔好畀啲花言巧語氹到！幸運地佢哋都好聰明，只能夠講懂得欣賞我才華嘅人都好有思考能力。」最後他更搞笑呼籲騙徒改邪歸正：「有啲行業，賺到嘅錢同種下嘅孽係成正比嘅，騙徒就係一分耕耘一分孽債，越努力越危險，我建議各位師兄姐轉行！」
周嘉洛公開呼籲Fans切忌誤信糖衣陷阱：「我係絕對唔會私訊Fans攞錢嘅，大家記得唔好畀啲花言巧語氹到！」

周嘉洛率先到渣打「防騙便利店」體驗，試玩後表示此體驗活動可教育大眾遠離電騙「呃」運，每個設計都極具心思又有意義，更鼓勵大眾到店體驗兼打卡。

周嘉洛現身與一眾嘉賓齊齊為渣打銀行「防騙便利店」開幕，歡迎大眾到場免費體驗！

今年的渣打「防騙便利店」分成三大互動區，首個打卡位放置巨型杯麵，市民可以齊齊「揭開騙徒真麵目」；投資糖果區，提醒市民提防投資糖衣陷阱，切忌「耳仔軟」誤信「贏硬」投資攻略；最後以香港特色「點心」，提醒市民小心不同類型的電子支付騙案，記得「防騙要用點心」。各入場人士完成三大展區的遊戲後，可於收銀處免費換取「防騙便利店 X 大麻成防騙便利袋」及「防騙要醒水」飲品一枝（數量有限，送完即止）。