夏韶聲接受新城《One Music Corner壹角樂》錄音訪問 憶上《歡樂今宵》感飄飄然 唱《空凳》慘遭餐廳老闆炒魷

有「香港搖滾教父」之稱的夏韶聲（Danny Summer），日前到新城廣播接受梁兆輝（Brian）主持的《One Music Corner壹角樂》錄音訪問，Danny除了暢談跨越半世紀的音樂生涯，又披露即將於8月舉辦的《Last Summer》紅館演唱會細節，期間Danny金句頻出，展現出對音樂的執著和熱情。

節目甫開始，Brian以「樂壇變色龍」形容Danny多變的音樂風格，Danny幽默笑稱：「你漏咗一個名，好多人都叫我陳近南！」重提他在98年參與無綫劇《鹿鼎記》中飾演的陳近南一角。

談及音樂起點，Danny回憶道：「我係60年代喺歌廳彈bass開始，然後打鼓，有啲樂器未學識都要被迫上台，總之百搭就多啲機會。當年亦冇諗過將來要紅或者做super star，只要每晚返工畀錢我出糧，我又可以畀到家用就做。」他特別提到70年代上《歡樂今宵》演出的趣事，「雖然第一次腳都震，但上電視係好大件事，狄波拉、薛家燕都喺度，我話畀自己聽千祈唔好跌支咪落地下，過咗呢晚之後，行出街都飄飄然，但就只係飄咗一陣。」

然而，Danny亦曾遇過低潮時，他透露79年憑《童年時》成名，卻遭餐廳解僱，「老闆話《空凳》歌名意頭唔好，話冇生意，所以自己都冇得撈，我都估唔到，之後失業咗8個月。」談到相隔25年再登紅館舞台，問及演唱會名稱，Danny解釋：「我唔係告別，但『Last Summer』呢個名大家去意會，將來仍然可以見到我喺唔同層面，今次就畀我做一個好有體面嘅演唱會畀我嘅fans。」