關嘉敏接受新城《開心大派對》節目訪問 家燕姐力銷姜卓文 Carmen大叫：我好鍾意佢㗎！

關嘉敏(Carmen)現身新城廣播接受《開心大派對》節目訪問，節目一開始，即被兩位主持薛家燕及思敏好奇追問連串關於她參與TVB《女神配對計劃》戀愛綜藝真人騷的問題，非常搞笑。

家燕姐劈頭即八卦地直問Carmen當初參加時，會否諗「係咪嚟真？」、「真係鍾意咗咁會點？」而思敏也忍不住插咀追問「係TVB搵妳？」、「還是內部公開招募？」Carmen直言：「算是內部公開招募，當時正在拍攝一個樓宇短劇，監製導演知道我沒有男朋友，問有冇興趣參加？我話都好喎！其實我已有3年沒有拍拖。如果在節目中找到男朋友就當係Bonus，講真，邊有咁易搵到男友呀！拍個節目就鍾意上對方？當時，純粹覺得想玩下，認識不同的男性朋友。」

家燕姐直問依家揀到意中人未呢？Carmen隨即露出甜絲絲笑容，豪爽地直答：「其實我好主動地揀咗姜大衛個仔細John（姜卓文），哈哈！」家燕姐聽到姜卓文名字，即時開心到大叫並大讚：「佢係我世姪嚟㗎！我同佢嗲哋、媽咪好熟㗎，佢好乖仔，唔錯！」Carmen聽到後反應超興奮，更不顧儀態驚喜尖叫：「家燕姐世姪！我好鍾意佢㗎！細John未入圍時，已經睇中他，但當時他卻揀了Stephanie(李芷晴)，我好傷心呀！好唔開心！」

在傷心又唔開心之際，非常好彩的事發生了，只要參賽者被多過1位女神揀中，就要進行反選，由該位參賽者親自揀選其中1位女神，她即時把握機會向細John直接表白，她自豪說：「反選時，他就揀了我，哈哈！」家燕姐馬上恭喜她，繼續大讚及力銷細John：「佢好有禮貌，事業有一番熱誠，父母又教得好，恭喜妳呀！」

詳細節目內容，請留意6月28日，下午2-3時，新城知訊台《開心大派對》節目，網址：https://www.metroradio.com.hk/MetroInfo/