葉子楣舉行「華麗相聚之夜」生日派對 所有朋友的祝福令她渡過一個開心的晚上

藝人葉子楣Amy日前於酒店宴會廳舉行「華麗相聚之夜」生日派對，宴請一眾好友包括：胡楓、陳欣健、黃玉郎伉儷、樂易玲、馬來西亞酒店拍檔Evians、Daisy Yeung、麥當傑、舒雅頌、譚倩紅、文雋、夏文汐、周美鳳、鄧英敏、黃錦燊、連炎輝、汪曼玲、林爽兒(爽姐)、佘媽、古媽、冬嬸、詹瑞文、文雪兒、麥翠嫺、魏秋華、楊仲恩、吳麗珠、姚正菁、黃楚淇、李思捷、杜晶晶、鄧達智、伍健雄、查小欣、梁泰萊、陳德森、吳君祥、蘇姍、關寶慧、孫國林、龔柯允、Gaga傅淖鈴等，他們携同精心挑選的禮物到場祝賀壽星女。

宴會開始前，兩邊屏幕先播放由Amy孩童時代至今天的照片所剪輯成的短視頻，及後陳欣健 Philip 到台上說：「如果要用一個字形容Amy，呢個就係《大》字，因為佢真係好大方，而且佢大情大聖，佢嘅生活同埋職業都係大起大落。我識佢嗰陣佢只係一個少女，其他人話佢靠身材於是改咗個花名比佢，但大家記住喺嗰個年代整個社會同埋電影界都係好嚮往，甚至乎係迷戀喺一啲女性嘅性感嗰度，但係因為Amy有咁嘅天份，所以佢能夠係娛樂圈好快就有一個突破，當時佢忙到成日都見唔到佢。雖然佢咁成功，但佢突然間因為遇到一個佢好愛嘅男人，佢可以好大膽咁放棄一切，洗盡鉛華，放棄咗佢嘅名、利同埋社交活動，好悠游咁同佢心愛嘅男人靜靜過佢哋嘅幸福生活。但人生就係咁，當Amy佢係咁無求嘅時候，上天就比咗一個折磨佢，奪去咗佢心愛嘅男人，但呢一個挫折並無打低Amy，佢外表雖然係好嫵媚，但係佢嘅性格係非常剛強，佢唔單止冇被打低，重更加珍惜原來人生原來係咁珍貴，佢身邊嘅人係咁寶貴，佢要擁抱現在，唔好怕任何嘅嘢，於是佢就學識咗點樣去愛朋友，同埋幫助弱勢嘅人，Amy點樣對朋友？唔須要我多講，雖然今晚係一個生日Party，今晚亦係佢得到呢個啟示之後，要同我哋一齊懷緬當日同我哋相識時嘅快樂同埋緣份，同我哋一齊去感恩今日坐係現場嘅每一個朋友都咁好，每個人都咁健康，同埋最重要就係一齊譜出幸福嘅樂譜，有請我嘅葉子楣，你哋嘅葉子楣。」

一身性感打扮的Amy現身台上：「大家好呀，係咪好肚餓？但都要忍下先，有人問我今年生日會係咩主題？我希望大家都著到好靚嚟參加我嘅生日會，咁我就會好開心，亦有人問我今年點解攪個咁大型嘅生日會？其實真係冇咩特別原因，只係希望大家開心，一班好好嘅朋友係度食飯同相聚，我就已經好滿足同好感恩，多謝你哋嘅光臨。今晚大家飲嘅紅酒同白酒，係由百利達酒庄嘅Jacky Wong贊助，佢真係好客氣，我記得上年《神奇女俠生日Party》嘅時候，佢話我點解唔搵佢贊助啲酒？我話出年先啦，佢真係等咗我一年，佢仲提住我，所以佢真係好有心。我都想話比大家聽，大家見到枱面放咗好多盒紅、白酒禮盒裝，入面嘅樽面印咗我個樣喺度，原本我只係想搵我自己嘅相貼上去，但我覺得唔特別，因為好多人都係咁做，於是我就請咗我嘅好朋友黃玉郎先生幫我畫肖像，然後印出嚟貼上去，出嚟嘅效果真係好好多，所以我同Jacky講佢贊助嘅酒唔可以平，否則就會失禮朋友，佢好大方答我OK。」此時，Philip說有驚喜送給Amy，原來是黃玉郎把那幅為Amy畫的肖像畫裝裱起來，附上親筆簽名送給她，Amy說：「真係好開心，因為枝酒冇佢幅畫真係唔夠完美，而且黃玉郎唔係隨便幫人畫畫。」「今晚實在太多嘉賓，我唔逐個去介紹，不過首先要多謝修哥，因為佢94歲都嚟參加我嘅Party，佢係我最尊敬嘅前輩。」「第二個要多謝嘅係Alan連炎輝先生，佢做好多善事，同埋佢成日包場請大家睇戲，支持香港電影，我知道明年2026年係馬年，電影就會興旺，所以大家唔駛擔心。」「我都要多謝我嘅馬來西亞拍檔Evians，我本身係拍戲嘅，但突然間識咗佢，令我有機會走去商界，投資酒店，我會多多向佢學習。我都要多謝親姐姐，得佢一個人夠膽鬧我，因為係兩年幾前，我出返嚟俾記者影到相，佢竟然話我做乜出嚟，妳睇下妳，最憎妳出嚟，妳收埋自己咪好囉，妳出番嚟就比人指指點點，我同佢講做我哋呢行已經習慣比人影，因為我覺得唔會全部人都鍾意你，亦有人會唔鍾意你，我已經習慣，我記得周星馳都比網民批評過，不過佢答咗呢六個字《佢未了解我啫》，其實啲人唔了解我唔知我性格，但我亦都唔會同佢哋解釋，我覺得我就係我，做番我自己係最開心。」現場掌聲雷動並大叫Amy，她續說：「我自已一直心存五個心，對人要真心、對自己有信心、做事要有決心、最重要係懂得將心比心，我相信對人好一定會有回報，就好似今晚見到咁多嘉賓著到咁靚嚟到參加我嘅生日會，我真係好感動，所以我覺得今晚點都係我最好嘅回報同最大嘅感恩，多謝你哋。」接著Amy便為大家送上一曲陳慧嫻的「人生何處不相逢」，唱畢此曲後，她說：「今晚好唔好玩就交比大家，希望大家玩得個Party好玩啲，好，開飯。」

在晚宴其間，胡楓、陳欣健、黃玉郎伉儷、舒雅頌、夏文汐、楊仲恩、李思捷、蘇姍及龔柯允等也有上台唱歌送給壽星女，Amy也隆重其事換了另一套衣服出來再度高歌一曲草蜢的「失戀」，及後她表示這個生日會令她最難忘的是來自所有朋友的祝福，與及和她一起過生日，令她渡過一個開心的晚上，「我嘅生日願望係心想事成，要乜有乜，今年已經很好，但希望明年更加好，大家愈嚟愈好，我就會好開心。」Amy 透露她用了三個月時間籌備今次生日會，因為要一早預約朋友，而她全晚最開心的一件事，便是馬來西亞拍檔Evians 特別把早前由馬來西亞拿督基金會頒發的《80年代最具影響力女演員》奬項人肉速遞到香港給她，這個奬是對她在電影工作上的肯定，她以後會繼續努力，答謝大家對她的支持。