吳林峰演唱會群星撐場 靠「食飯盒」補充體力

唱作歌手吳林峰於西九舉行一連三場《吳林峰 To Be…演唱會》全場爆滿，除邀得林愷鈴任嘉賓合唱《攤手黨》外，MIRROR成員Jeremy 、柳應廷、許廷鏗、DJ當奴、少爺占、歌手moon tang、王雙駿等等捧場！吳林峰去年堅持「每兩星期」創一首新歌，呢晚演唱會一口氣唱出27首歌曲，為呢個創舉劃上完美句號。

台上吳林峰公開多謝女友，感謝對方不離不棄，坦言過去一年「幾辛苦」，表示會珍惜對方：「來年都要做多啲騷、寫多啲歌比人嘅！（儲老婆本？）女朋友好好啊，我地都要儲錢……去旅行嘅，老婆本就遲啲再講啦！」

因為呢次個唱將去年作品作總結，吳林峰就話感覺好輕鬆：「原來演唱會唔洗揀歌係幾爽，不過都要將啲歌分類、編曲。搞呢次音樂會係好瘋狂嘅一件事，今日要開日、夜兩場，我都知要好大體力，所以出騷前都食咗好多野，一陣夜場開騷前會食多個飯盒補數。」

提到偶像方大同突然爆出死訊，吳林峰表現神情傷感：「佢嘅作品影響咗我地呢代嘅歌手，尋晚都有唱《好不容易》致敬，我知大家都好傷心，但呢日都盡量唔提太多啦。」