區瑞強三兄弟妹同台第一次追憶母親感動落淚吳大強超睇好契女范明熙實力顏值兼備音樂世家韋綺珊陪伴女兒黃芮琳超水準演出

2024-11-11 浩楠

區瑞強（ALBERT）11月8、9日於伊利沙伯體育館舉行一連兩場《區瑞強全民共享同你有親演唱會2024》，兩場均全場滿座。ALBERT 11月9日第二場邀請了韋綺珊及女兒黃芮琳、吳大強及契女范明熙、及ALBERT親弟妹區桂芬及區瑞明。

演唱會以「同你有親」為主題，ALBERT與親弟妹區桂芬及區瑞明首次同台演出，ALBERT 笑言：「我當年於城市民歌創作比賽做評判時，才發現啊妹區桂芬偷偷參賽，係演唱嘅參賽者之一，當然我有避席啦！點知佢最後仲贏埋冠軍。細佬區瑞明平時幫我做幕後居多，點知原來又係唱得之人。」三兄妹提及於天堂的母親一度哽咽，合唱《念親恩》、《父母恩》及《愛是不保留》，三人第一次同台演唱送給母親，場面感人。

嘉賓吳大強獻唱一連串英文歌曲Delilah、Let It Be及Hey Jude，並與契女范明熙（小V）一同送上《還有》及《你最珍貴》。小V非常感恩：「多謝Uncle Albert 俾機會我有咁珍貴嘅演出機會，而我非常欣賞Uncle Bill 嘅歌聲，平時聽佢唱英文歌多，好多謝佢今次遷就我，同我合唱中文歌。」吳大強亦非常欣賞契女：「小V佢除咗有顏值外，歌唱實力都非常好，而且虛心受教，我相信佢不久將來一定會發光發亮。」

而出生於音樂世家的韋綺珊及女兒黃芮琳亦獲邀擔任嘉賓，韋綺珊率先與ALBERT合唱經典之作《相逢何必曾相識》，並送上《有了你》。而女兒黃芮琳獲邀於台上獨唱《新不了情》，韋綺珊更貼心於同上陪伴女兒，非常溫馨。韋綺珊指：「阿女十幾歲時經常到ALBERT電台節目演唱，好多謝ALBERT邀請咗我哋於今次演唱會擔任嘉賓，仲叫阿女自己唱一首歌，就促成咗今次嘅演出。」

是次演唱會兩場均全場滿座，ALBERT感謝一眾粉絲支持：「為咗報答大家，嚟緊我會應粉絲要求，於出年五月再次開騷，唱盡我一生中最喜歡的中英文民歌，滿足一眾民歌粉絲。」而區氏家族個個唱得，包括ALBERT 兒子區昕進也是唱得之人，被問及會否考慮舉辦家族演唱會？ALBERT 笑言：「諗得過，起碼我地家庭聚會時可以搞一個先！」