何展睿「三心兩意」創立香水文青品牌

唱作歌手何展睿Steve剛於尖沙咀完成自家香水文青品牌Simple Times發佈兼一日店長活動，花了接近一年時間籌備，更透露經常去旅行汲取靈感兼偷師，笑言創業之道講求「三心兩意」：「用心研發產品；耐心制作產品，特別手工皂跟線香，前者做完要曬乾兩個月，後者好脆弱好易整斷，制作時要好小心；事前係銷售同形象上要落足苦功，咁先可以有信心推出市面！另一方面要講求「心意」同「創意」，自己制作產品就好似做比親朋戚友咁用心，除咗市面上傳統產品外，仲要花心思設計特別產品，譬如岩岩去完日本嵐山旅行，眼見一片竹海，自己就設計咗一支「竹林深處人家」既香水。另外，同太太經常旅行，於是研發咗集淨化、放鬆、助眠、提神、滋潤、清潔，六大功能於一身既旅行套裝！」

Steve表示太太為品牌貢獻甚大，平日他們形影不離，當日也有到場力撐：「創意同勞力方面就由自己去做，至於形象設計上就要聽老婆意見。我比咗好多產品佢試，佢會對香味、質感上比好多意見我。而攝影上我真係投降，因為佢見到我上載社交平台既產品相影得唔好，即刻幫我重新再影，仲教我好多拍攝技巧！」

而當日現場Steve更邀請運動員、音樂人嘉賓到場作示範，原來當中有特別意思：「搵咗兩位唔同年齡、性格、職業朋友做示範，現場比佢哋做心理測驗，分析性格，即刻為佢哋度身訂造產品，係比自己嘅一個考驗，好彩事前做足功課，冇喺鏡頭前雞手鴨腳，不過錄影時就好似講到教煮餸咁，大家開心笑到見牙唔見眼，下次要加多啲盞鬼元素，講得生動啲拉！」