[新歌推介] 鄧月平逆市瞓身開工作室 新歌《U》打響頭炮

鄧月平(Larine)今日(3月1日)推出新歌《U》,闊別2年回歸樂壇,除了邀請到著名音樂人T-Ma馬敬恆編曲及監製,更自己參與填詞部分:「呢首歌想表達每個人心裏都有一個無可取代的人,思念是一種幸福,歌詞內容是自己過往經歷有感而發的。這首歌用輕鬆曲風,希望有相同經驗的朋友得到共鳴,亦都鼓勵大家勇敢表白。」

鄧月平新歌《U》MV

今次MV製作更非常心思,除了搭景拍攝足兩日兩夜,Larine更以8個不同造型示人,部分服飾更遠從羅馬運到香港,她指:「我最鍾意愛麗絲造型,當初跟導演提過想有童話故事元素,拍片團隊十分熱血,為我通宵搭咗個咁精緻的場景。」

不過Larine就話少少遺憾MV沒安排男主角,她表示:「其實本來都邀請咗幾位朋友做MV男主角,但佢哋都係圈中炙手可熱男神,所以未有檔期拍攝。其中一個就係游學修,不過佢都好有義氣,雖然夾唔到時間拍MV,但知我單身咗好耐,就趁元宵節上我YouTube Channel 一齊拍煮湯圓滋潤吓,做咗我頻道第一個男嘉賓,多得佢先多返啲戀愛感覺。」

剛剛跟前公司完約,逆市之下決心闖一闖自組工作室,Larine就表示:「好多朋友覺得我冒險,我認為趁年輕,有夢想目標就應該去嘗試,激起我喺呢個時勢做咁大的新嘗試。疫情期間,雖然工作量減少,但多咗時間學唱歌、排舞,認清自己好鍾意唱歌,想自己學習唱作,加上平時都喜歡寫作,好想透過歌曲同大家分享心事心得,今次新曲就初嘗填詞,希望日後有機會參與更多創作部分發光發亮。」

問到自組工作室,有否感到壓力?Larine就話:「雖然開設工作室唔係咩大數目,但真係成副身家拎出嚟搏一鋪。自己性格喜歡自由,希望創作的空間、自由度大啲,帶到唔同面貌俾觀眾,放下以往包袱做自己感趣的類型,幸好遇到志同道合經理人同團隊。下一首歌就想挑戰唱快歌。既然心中都已經有明確目標,咁不如就大膽試吓,後生唔搏幾時搏。」

浩楠

Stars-hk 創辦人, 希望建立一個只談專業, 不談八卦的娛樂資訊網站。