姜濤變身「潮男」擺天然呆Pose拍FILA廣告

入行短短兩年的姜濤，早前頒獎禮獲得「我最喜愛男歌手」獎項，風頭一時無兩，近日被潮流運動品牌FILA FUSION再度邀請，拍攝新一季系列廣告，更以姜濤的音樂歷程做主題，令他重新感受蛻變的自己。

姜濤表示自己仍有不足，但會努力做好每一個工作，積極為未來奮鬥：「其實今次廣告同我都好似，起初攝影師都叫我擺番啲天然呆嘅Pose，回憶翻好似剛剛入行嗰陣，好多時未了解到發生咩事；到依一刻發現自己唔係新人喇，要Move on冇人再比機會你去試，要更加有自信去做每一件事，所以去到拍攝後半段佢地叫我眼神要肯定啲！哈哈，不過我都唔知做唔做到品牌嘅要求。」

由樂壇新人獎晉身做「我最喜愛歌手」得主，地位急速變化，姜濤亦要重新適應：「好似就嚟過年，以前我係負責逗利是，依家經理人同我講，過年開工要派利是比工作人員，我都覺得怪怪地、未習慣，但係成長過程就係咁，慢慢去學囉，而且身邊嘅人真係幫咗我好多，派比大家都係開心嘅。好在過年前接到呢個廣告，當做幫補吓啲利是錢。」

今次拍攝鞋款極為「矜貴」，未正式推出已掀起炒風，姜濤拍廣告亦不忙為兄弟謀福利：「呢款鞋都有好多隻顏色，我就問品牌可唔可以每款都比一對我，我要送晒比身邊嘅兄弟，當係新年禮物囉！又或者過年前比晒佢地，過年有新鞋著，襯番個隊型出嚟。其實新年都係開工，都唔敢周圍去住，如果攞到幾日假，想好好休息吓，諗吓有咩音樂靈感，來年從新出發。」