UTO娛樂| 超人的能力 | 林超榮：失敗之傷

　　《花木蘭》真人版2020，生不逢時，撞正COVID-19，大家心情麻麻，見到劉亦飛和鞏琍的演出，特別多挑剔。

老人家非常挑剔，《花木蘭》都不合史實，點解唔係打匈奴，而去打巫婆鞏琍，鄭佩佩化妝又鬼五馬六，客家土樓都出現在遠古，那個皇帝李連杰自已又打埋一份，真係……唉……

青少年也呱呱叫，不斷與卡通版對比，點解咁耐都無歌聽，又唔見「木瑟」條龍仔，變了隻凰鳳，又唔好笑……

以上問題，其實，只係一個問題，就係「唔好笑」。如果，《花木蘭》拍成喜劇，一切問題就不是問題，大家睇得不會認真，嘻嘻哈哈就過去。

迪士尼拍青少年卡通片／電影，少有如此失手，將這一個少年民間故仔，拍得如此嚴肅。如果，他們參考上一次真人版《阿拉丁》，又歌又舞，輕輕搞下笑，就不會被批到體無完膚。

其實，《花木蘭》就是典型處境喜劇，女仔扮男仔混入軍營，就如「梁山伯祝英台」，前半部都是喜劇處理。《木蘭辭》精彩四句「雄兔腳撲朔，雌兔眼迷離，兩兔傍地走，焉能辨我是雄雌」，充滿雌雄莫辨的喜劇味。

導演妮琪卡索是女人，將《花木蘭》寫成找尋真我，不要壓抑性別的主題，再加入鞏琍巫婆入魔的對比，黑鷹和鳳凰的象徵設計，視覺效果之餘，卻沒有半點戲味。

《花木蘭》是整個市場設計商品失敗，不要歸究甚麼政治因素，這個時候推出，只是死多二錢重。

林超榮