蘇慧恩用「咖啡」向張家誠「拜師」

蘇慧恩、張家誠(Alan)日前接受香港開電視節目《開工大吉77》訪問,為新歌宣傳做勢。蘇慧恩笑指對方是「感情教練」,放心將自己情史傾囊相告:「因為Alan想我唱得有感情啲,所以作曲之前乜都要講晒佢知。最終呢首新歌真係擊中晒我內心深處嘅傷痕,所以拍MV當日我喊到死吓死吓!」

訪問完結後,蘇慧恩向張家誠送上「咖啡」正式拜師:「因為佢一日飲幾杯,我做徒弟梗係要細心啦,佢幫我做歌又知晒我啲情史,分分鐘比爸爸更了解我的感情世界!頭先師傅問我仲有幾多單情史,可以用嚟做新歌題材,我都怕自己冇貨,到時可能要出賣朋友。」

同場的張家誠就話過去聽盡圈中人感情事,但蘇慧恩的情史比其他人特別:「其實我習慣聽大家過去情史,都係想佢地唱得投入,不外乎啲傻豬豬故事,不過蘇慧恩嗰故事比較幻海奇情,所以印像好深刻!可惜我身邊冇咩合適嘅男士可以介紹比佢,因為佢鍾意壞男人,我真係唔識呢方面嘅人才。」

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。