《十二傳說》黃建東被老婆趙希洛刺傷

「惡搞王」黃建東 (東東) 一向以自家製二次創作和搞笑見稱,但今次在《十二傳說》的大學傳說飾演一個有很多感情瓜葛的大學教授的正經演出叫人眼前一亮:「可能因為今次帶住眼鏡着得斯文見觀眾,加上個角色有很多內心嘅掙扎,收到很多留言話從來冇見過咁樣嘅黃建東,原來我係可以咁認真同嚴肅,唔係淨係搞 gag。多謝監製俾個機會帶出我嘅可能性,同埋要多謝啲好對手好似飾演我前女友嘅林夏薇同埋老婆趙希洛等。」

今次東東演出有很多挑戰,包括要被老婆趙希洛用刀刺死倒臥在血泊中:「拍攝嗰幾日用咗好多血漿,成身都血淋淋。因為我戴隱形眼鏡,返到屋企除眼鏡時發覺原來啲血漿洗唔甩,成對隱形眼鏡都變成粉紅色,最後要揼咗買過對,好大犧牲。」不過講到最心驚膽跳的一幕,就係要用繩勒死一個女學生同埋強行淹死另外一個女學生:「做施刑者真係緊張過做受害者好多,因為好擔心會整親人。好似今次要㩒個女仔個頭落水,之前都溝通咗好耐,如果佢個頭一退後代表佢要上水透氣我要即刻放手,所以拍嘅時候雖然個表情要好凶狠,其實內心係心驚膽跳同埋好大壓力。」

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。