【UTO娛樂】林超榮: 劇透變咗豬兜
【UTO娛樂|超人能量|林超榮】劇透變咗豬兜
《復仇者聯盟4》上畫，橫掃全球票房，香港票房破紀錄一日就收到一千萬。更史無前例，推出開埠以來第一個「晨早」場，不是普通早晨，係接近清晨「六點」場。觀眾睇完戲，歎過早茶，然後咬咬牙籤簽施施然返工。
上司好奇問：「今日咁早？」
「剛剛睇完《復仇者聯盟》。」
「好看嗎？」
「對唔住，我不能做豬兜。」
「乜鬼豬兜。」「即係劇透，你普通話講劇透兩字，發音就係似豬兜咯。」
部戲票房咁墟冚，好多中年人慕名入場。
我就喝止：「千祈唔好」。睇《復仇者4》有條件，你要係漫畫迷，或者記得之前三集劇情，否則，你不單止睇得不夠過癮，仲好似我，睇到一半就望錶。部戲全長三個鐘頭，票價最平要一百四十蚊。你唔好搵錢嘥。
老實講，部戲無乜橋，「豬兜」都唔怕。講到英雄挽救地球，都係靠穿越時空。
呢一條舊橋，都係抄當年第一集《超人》，超人要救死去女友，搞時光倒流，飛上太空，推住個地球回轉，呢條真係絕橋。
至於，最後大結局，超級英雄盡出，黑豹、蜘蛛俠、奇異博士……都出晒來，打成一片。呢場戲好似睇「金庸武俠群英會」，神鵰大俠和令狐沖同台唱歌，東邪西毒殺上光明頂，紅花會陳家洛拜會武當張無忌一較高下，韋小寶去華山論劍，金庸迷非常興奮，不看武俠小說的，就覺得亂晒大籠。
林超榮
#林超榮 #UTO娛樂
