戴綠帽黃建東同抱B簡淑兒 影婚照

藝人黃建東 (東東)擅長扮鬼扮馬,搞笑形象深入民心,最近獲邀同宅男女神簡淑兒 (Jessica)一起拍安信兄弟網上廣告,更用了最近熱播的《深宮計》變成《深宮計番外篇之深「窿」計》:「TVB的創作團隊好厲害,一聽到《深薩計》呢個名已經想笑,仲諗到要搵我扮《深宮計》馬國明半裸出浴的那一幕,好有勇氣,哈哈。不過唔知點解我作為TVB最冇身材嘅男演員但係偏偏成日都要我剝衫?好似《果欄中的江湖大嫂》、《降魔的番外篇》及《平安谷之詭谷傳說》就已經成日要半裸上陣。」

不過東東話最緊要出嚟效果搞笑,所以就算今次要淨係着住條褲躺在地下撥扇、玩玩具車同淋水都毫無怨言:「我應該淋水淋咗差唔多三十次,個木桶好重,啲水有幾次仲入埋鼻孔,不過好彩拍攝時天氣好熱所以唔會冷親。由於淋水場口之後仲要拍攝同 Jessica結婚場面,但係我唔記得帶多條底褲替換,所以拍淋水時決定真空上陣。好彩以前做娛樂新聞主播是已經同 Jessica合作開,同埋就算真空對住宅男女神但係keep住淋凍水,所以先冇任何尷尬事發生。」
不過東東笑指當他現場同大家坦誠了真空的秘密後卻嚇到女導演哇哇大叫。

劇情講述 Jessica 無意中看到半裸的東東在沖涼,心如鹿撞,跟住東東仲乘機錫手仔求婚,非常甜蜜又帶點油膩。之後兩個古裝人着住西式禮服影結婚相非常搞笑:「導演想我哋用古代中式髮型襯現今西式禮服,很有fusion的感覺。(怕不怕被女神粉絲眼紅?)一啲都唔怕,因為出來的效果只會是很搞笑。」去到故事最尾暗示 Jessica給東東戴綠帽,非常抵死。

浩楠

Stars-hk 創辦人, 希望建立一個只談專業, 不談八卦的娛樂資訊網站。