雷晴雯扮狐仙變蘭劍 地獄壽司勾經典回憶

藝人雷晴雯 (Winnie) 日前以一身行到爆嘅狐仙古裝造型出席歌手楊峰於尖沙咀舉行的「猛鬼投胎生日派對」,點知一入場即時被其他嘉賓大嗌《天龍八部》,楊峰直情即時人肉網搜,誓要搵返佢喺《天龍八部》演蘭劍張相出嚟俾大家睇,令Winnie覺得既搞笑,但又啼笑皆非:「我個妝同蘭劍根本兩回事,諗起我《西遊記》演蜘蛛精都仲話有少少共通點,諗起《天龍八部》就真係有啲搲頭。不過都開心嘅,廿年喎!起碼證明我無乜點走樣,觀眾都仲記得我。」

林凱欣與Winnie同樣扮狐仙,卻是兩種完全不同的風格

Winnie坦言因為自己係虔誠基督徒關係,萬聖節從來唔關佢事,今次嘅派對主題就咁啱要扮鬼,令佢糾結咗好耐:「我對鬼同邪靈真心極度抗拒,正所謂唔見過鬼唔怕黑,我見過又feel得到,所以除咗工作都絕對唔會用扮『鬼』嚟玩,所以先偷雞著套狐仙衫再化個妖艷妝當過關,但可能心底始終覺得有少少唔自在,結果化妝過程係咁不停打爛嘢,打爛杯又打爛玻璃兜,搞到遲晒到,仲要俾峰哥話我一啲都唔『嚇鬼』,笑我無料到添!」不過最估唔到嘅係,原來Winnie當晚嘅梳化服全部由佢自己一手包辦,造型Pro到連胡櫻汶同李文標都嚇一大跳:「文標俾我嚇到真係呆一呆棟咗喺度,櫻汶仲搞笑,話我個look令佢覺得好似返咗TVB咁!」

仲玩埋「獎門人」經典遊戲,不過就叫「地獄壽司邊個食」,最後Winnie果隊勝出

當晚楊峰除咗搞唱K大賽唱到爆咪,仲玩埋「獎門人」經典遊戲「地獄(辣辣)壽司邊個食」,Winnie笑稱當刻即時彈起當仁不讓,一定要重溫返當年嘅經典回憶咁話:「當年上『獎門人』玩,好記得我同Sherming (姚樂怡) 齊齊中招,根本就係一層薄飯包住一大舊Wasabi,但咁啱我兩個都食得辣,食完完全無反應,眼淚都無一滴,結過完Show俾工作人員拉埋一邊照肺,話我哋玩得唔專業,觀眾就係鍾意睇我哋眼淚鼻涕勁流個樣。我當時真係頭頂三條線加成群烏鴉飛過,完全無嘢好講囉!」

問Winnie近排除咗煩官司仲有乜搞作,她表示會繼續為其《舞影藝文》頻道努力,最近又再以美容KOL身份開多一個專業美容資訊頻道,遲下更打算再次執筆踩返入出版界,亦傾緊幕前演出,百足咁多爪,難怪佢話希望上帝可以一日變多24小時俾佢囉!

Winnie、師弟劉家聰(Martin)、吳堯堯
李文標胡櫻汶與Winnie相識廿年,都可以被Winnie嚇一跳,以為返咗古裝街。

浩楠

Stars-hk 創辦人, 希望建立一個只談專業, 不談八卦的娛樂資訊網站。