[K韓旅行社] —— 「밥묵자」 、「釣魚CAFE」

0
929

如果各位有機會同啲韓國學生妹妹或弟弟做到朋友的話,aki極度建議真係要約佢地出黎齊齊玩一日!首先係因為,你同佢地一齊既時候,成個人真係會感覺青春左十年,而佢地諗出黎玩既野都十分可愛!

話說個次aki回鄉,約左兩個韓國高中生朋友出黎共聚,可惜係女仔T^T….如果我係男仔你話幾好!但呢兩位妹妹有點特別,我地約左係弘大見面,佢地雖然遲左啲,但係信息到已經不停地「姐姐、對不起」講到見到面都仲講緊~XD你話點嬲得落呢~~而我就一心等佢地帶路同去特色小店食野咁啦,但原來佢地好坦白話,佢地都係第一次黎弦大,因為佢地係住得好遠,係個地鐵圖既左下方,無記錯的話好似叫富川,都要坐成個幾兩個鍾車,咁遠佢地都上黎,真係幾感動 !所以,就變左我帶左小小既 ,之後就3個一齊拎手機搵路問路,而韓國始終有好重既階級觀念,見到我手上有野拎,佢地就好自然地要幫你拎,享受做大姐既一刻^0^ 

我地3個觀光客搵路途中,路過一間雪糕鯛魚燒店,妹妹們即刻落力誘惑我一齊食,但明明陣間要食正餐!所以最後,我都係決定食左。但個口感真係幾得意,又「鯛魚」熱熱地,但個雪糕就冰冰地,有幾種口味揀,我就揀左芒果,佢地就好似牛奶~但印象中好似好多人都食過,但aki就真係唔記得個名! 

邊行邊食邊搵,終於黎到一間妹妹們揀既食店「밥묵자」啦!佢地話網上好多人講呢間野好好食,但小妹又真係未聽過,可能係韓國人圈內或者小妹孤陋寡聞。但店外面就真係好多人排隊,同埋啲價錢又真係唔太貴,食住等吹住水等時間就好快過!入到去,店面都幾靚,同埋真係好多學生同年青人、情侶黎食,成個舖頭洋溢住青春氣息,真係食都食得開心啲!佢地唔係話太多選擇,我地揀左個豚肉燒既餐,唔聲唔聲原來有咁多野食!我仲諗住叫多幾個小菜添~但原來真係唔使,我地3個女仔都食唔哂個2人分量既餐。佢地既飯係用金色既銅飯盒裝住,好有那些年學生既感覺~到埋單個陣,諗住我請,佢地就不停咁叫唔好話犯法!我先醒起,,個時岩岩推行左「金英蘭法」,唔可以請人食飯過3萬圜!所以大家如果請韓國朋友要記得啦! 

食飽飽之後,佢地仲要話去釣魚cafe,個時心中都好佩服佢地既食量…..正當我咁諗既時候,一去到店門口,我就呆哂…..因為真係「釣魚」架!!我仲以為係個店名係叫「釣魚」,cafe既字,係呃人架!基本上韓國人見到一啲東西既集中地都可以叫cafe!aki真心被fake左落海啦今次~妹妹們見我有點驚訝既樣,就問聲我:「還好嗎?」,在下當然強裝鎮定一入去啦,妹妹話呢到係EXO成員KAI同f(x)既Krystal黎過秘密約會既地方!我都不得不佩服佢地既特別愛好!開頭仲諗住佢地係因為追星效應先黎,但原來唔係!佢地兩個係真係識架!!仲要不停釣左十幾條,而店主oppa們都好驚嘆,話有一條差既重量差一啲就破左店既紀錄!我真係不停狂呼,太厲害!而我就變左個攝影師,係咁影啲oppa同妹妹們既英姿!而呢到就係以換禮物既形式進行既~店主oppa們好玩得同好溫柔,私人送左3支靚靚護手霜比我地,佢地個樣仲唔差架!妹妹們仲成日強調有個好俊俏,所以成日叫佢地幫忙XD….如果大家想試下另類「CAFE」,可以黎弘大,滿足哂! 

最後,我地3個為左搵靚仔OPPA問路,足足行左成個弘大5次!而重點係、我地已識路^_^

呢啲真係~~青春呀~~~

NO COMMENTS