[Stars Girl] 獨立自主 張敬仁Kendy重新出發

人生種種決定,需要鼓起勇氣跟隨自己的心靈與直覺。張敬仁 Kendy 由銀行工作轉為演藝;透過選美入行,卻沒有入電視台,上年簽約經理人公司。一個又一個的決定,她選擇跟隨自己的步伐,不盲目跟隨別人,在演藝路上重新出發,希望讓大家了解認識她。

1. 我知你入行之前喺美國做投資銀行工作, 高薪前途好, 點解你會入演藝圈?有冇覺得好「嘥」?

細個時候,合唱團同戲劇朗誦喺我成長過程佔了一個很重要的位置。心底裏很喜歡演藝工作,不過唔夠膽承認,畢業工作後去到一個時期,始終想忠於自己,所以選擇選美入行。至於金融仍然係我有興趣嘅科目,我覺得學咗嘅嘢,永遠屬於自己,唔可以話「嘥」。或者將來我做生意,一定會有機會可以用得到。

2. 你同期嘅港姐大部份都入TVB,當時有報道話你會入,點解後來冇入?

每一個人都應該好好選擇適合自己嘅路。坦白講,當時心裏面真係好掙扎,始終電視台比較「入屋」。但我衡量過自己嘅性格同情況,想長遠點看自己事業,多些不同嘗試,例如音樂、舞台劇、電影等,我亦感恩遇到我的經理人。

3. 選美之後這三年來,你做過什麼?

其實港姐嘅經驗只幫到很少,我喺演藝圈始終係一張白紙,要裝備自己去學演戲唱歌。然後自己整portfolio,去casting,任何演出機會都嘗試,希望儲多些經驗,擴闊人脈。一步一步扎好根基,感覺實在些。

4. 當中有困難時刻嗎?家人支持你嗎?

這頭幾年係有點壓力,我想大部份藝人也經歷過的。有自責嘅時候、有經濟壓力嘅時候、有親戚朋友質疑嘅時候,最傷心係聽到親戚嘅一些說話,因為我由細到大喺佢地心目中都係乖乖女,我想佢地高興但又好矛盾更想活出自己,花了些時間去適應磨合。既然決定了,就要堅持,明白凡事有取捨。我嘅父母亦很體諒支持我,好多謝佢地。

5. 我知你嚟緊會演戲唱歌兩方面發展,可唔可以講下你嘅計劃?

現在主要排練五月頭嘅音樂劇場《那一年,我們沒有了廣東歌》,除咗演戲仲要做手語同跳舞。唱歌方面,完成了第一首歌,由鄭汝森 Anthony監製的,屬於淡淡憂傷嘅情歌。另外之前演出《思覺危情》係好好嘅經驗,希望將來會繼續有不同角色去嘗試。

攝:Tommy Tang
MUA:Natalie Wong
Hair:Esther (朴 Park)
Styling: Wingki Chan
Clothing: October1

浩楠

Stars-hk 創辦人, 希望建立一個只談專業, 不談八卦的娛樂資訊網站。