[K韓公社]韓影意聞錄—–<秘密任務>
前幾日收到邀請去睇左由玄彬、柳海真、潤娥(少女時代成員)主演既電影<秘密任務>,呢套係玄彬時隔左兩年回歸大銀幕既作品,完全睇到佢狂減15kg係真係幾痛苦,飾演一個北韓警司仲要咁多武打場面,真係唔簡單!加埋潤娥既花癡演繹、柳海真呢位資深演員既演技,雖然典型既劇情,但每個鏡頭都睇到用心既地方!
玄彬飾演既北韓軍官,可以話係入型入格,為左角色而減到面都「粒」哂,鐵漢卻帶柔情、冷漠卻帶可愛、看似無情卻滿滿的義氣。第一次拍動作戲既佢,唔用替身親身上陣,仲特地苦練俄羅斯軍用格鬥技「Systema」,至於內心戲,玄彬既演技無容置疑,處理得岩岩好。
而負責為電影添上粉紅色,放笑蛋既潤娥,睇完呢部戲,我係開始對佢改觀我相信有睇過佢之前既作品既人會明既~但佢呢次做一個充滿少女心,成日FF,講真令aki我好有共鳴,身旁友人都忍唔住同我講左一句:「你嚟架wor!」,我認FF真係好開心架!而潤娥呢次佢係做得唔錯,呢個少女既角色對佢無難度,佢同玄彬既互動真係幾可愛同好笑,令成套電影添上輕鬆既時間。而間中都有唔少搞笑「男男CP」、比人反追踪等等既情節!
但令aki最深刻,都係佢地每一個動作既場面,不論飛車、跳橋、武打,每個鏡頭真係拍得好靚!特別係玄彬同奸角金柱赫飛車追逐既一幕,玄彬為左可以射爆佢個輪胎,索性踢爛自己架車個車門,揸住支槍成個身就咁「隊」出去瞄準,個畫面拍得好靚,所以佢地既動作團隊真係唔講得少!雖然係一套典型既南北韓警察聯手捉賊既劇情,但有好多位都睇到,劇組好用心地想展現常見劇情、不同演繹。
