姜麗文幫2PM作K-pop主打

Lesley_ (3)

創作歌手姜麗文 (Lesley)音樂造詣非凡,以前曾為天后陳慧琳寫過《So Hot》,又為歌神陳奕迅(E神)作過《主旋律》,今年Lesley再進一步,進軍領導亞洲音樂的韓國樂壇,為南韓人氣天團2PM今日凌晨發佈的重磅新歌《Promise (I’ll Be)》( https://www.youtube.com/watch?v=dfEyn_LikFU ),參與作曲、填詞、監製、錄音兼和音,而她更屬首位港人寫K-pop主打歌。

去年11月,Lesley在東京睇2PM成員Jun.K(金閔俊)演唱會,兩人於後台合照後傳出緋聞,不過Lesley毫不擔心今次合作惹緋聞再起:「我同2PM係好熟,最熟係Nichkhun同澤演,佢哋係我好兄弟,我哋成日都會分享自己寫嘅新歌,互相鼓勵俾吓意見,之前佢哋話今年嚟緊會有新歌,問我會唔會參與,咁我就飛去韓國同澤演一齊寫咗《Promise (I’ll Be)》呢首歌。我係絕對唔驚緋聞,我哋嘅友情係好公開,好多人都知我好多年前已經係2PMfans,所以唔驚fans會嬲我。」

今次有幸被2PM採用作品,原來Lesley要過關斬將,她與澤演作歌後,要交由2PM所屬的JYP娛樂全員投票去選定採用歌曲,她說:「佢哋嘅公司要開好多會,等嘅過程係最緊張,有一日我知道揀咗我哋首歌入CD,我已經開心到飛起,跟住再等多三個禮拜之後,佢哋再開會投票,當知道大家投票用我哋首歌做主打歌時,我喊到黐線,嗰晚就同阿爸(秦沛)出去慶祝,去飲酒,好開心!」

Lesley哥哥姜文杰(Benji)對胞妹實現這個大project,當然感到非常驕傲,他最希望能夠讓大家關注香港音樂人的努力,Benji說:「妹妹真係好努力追尋自己嘅麪包,追尋自己嘅夢想,我哋兩兄妹雖然一次又一次面對困境,但我哋都好振作、好努力。我會祝福Lesley,預祝《Promise (I’ll Be)》嘅hit rate突破3億,犀利過我首《在一起》(2.8億點擊率),哈哈哈!」

浩楠

Stars-hk 創辦人, 希望建立一個只談專業, 不談八卦的娛樂資訊網站。 STARSHK 總監, 星雨文化 董事, 藝人及名人管理, 項目:OTO 平台Artist-HK,活動統籌,