唐紫睿約鄧穎芝蒲吧睇激戰

女子格鬥真人騷《G1格鬥會》，在剛過去的周末和周日橫跨兩集，連播由同樣兩戰全勝的唐紫睿（Hazel）及「Van仔」鄧穎芝對壘、在無任何護甲下堅揪的五場回合激戰。

昨晚Hazel和Van仔更相約大班朋友到酒吧一齊睇比賽，其實這場賽事十分緊湊，幾個回合甫開賽Van仔都被技術及靈活度較佳的Hazel打中面門，但之後Van仔都可衝入Hazel核心內圍抱腰撞到地上，扭作一團進行地戰，Van仔一直在上方力圖取得騎乘優勢（top mount）出拳，但Hazel勝在能夠把學到的都活用到擂台上，幾次轉閉鎖式防衛（close guard）成功化解危機，更伺機使出三角絞（triangle）及十字固（arm bar）等MMA精采技術，可惜都因時間及力量不足，被回合鐘聲及Van仔的蠻力瓦解其攻勢。

到最後一round，Hazel凌空使出arm bar，把Van仔鎖得臉色發紫幾乎投降，但Van仔仍可捱到完場，結果經裁判判定，Van仔以點數98比91勝出，悉力以赴的Hazel亦雖敗猶榮。

今場賽事非常精采，大力Van仔除了數次將Hazel成個抱起樁落地之外，混戰中更拉低Hazel bra top險些露點，事後Hazel說：「差少少露點，好彩Van仔有察覺鬆手，其實嗰晚我冇黐乳貼，如果咁樣唔覺意露點就真係唔抵，好大犧牲啦。」原來當日唐媽媽亦有到場，睇完阿女比賽之後，嚇到周身唔舒服，Hazel表示：「嗰場我輸咗後，媽咪有上台，佢驚到胃抽筋，痛咗幾個鐘，我仲記得佢上台時第一件事就話我打咩比賽，我一路喊佢一路幫我抹眼淚，好似細個咁，其實好感動。」

Hazel和Van仔因比賽而友情昇華，Hazel稱：「噚晚同Van仔睇得好開心，我哋嘅朋友都有一齊嚟睇。我打完呢場之後整親條腰，因為Van仔太大力，佢舉高我然後撻落地下，我撻親條腰，跟住嗰兩三日都郁唔到，但我好多謝van仔，如果唔係佢，我唔會showoff到呢幾個我練得咁辛苦學番嚟嘅嘢。」