何俊軒潘冠霖布偉傑為慈善首次行騷 軒仔為食掙扎一哥女友撐場 冠霖完成夢想

12

日前藝員何俊軒CTI、潘冠霖(Deborah)、一哥布偉傑,齊齊獲邀於山頂的荷蘭總領事館官邸舉行,為兔唇兒童籌款的Perfect Imperfections Charity Fashion Show 2016擔任星級Model,為是次活動合作伙伴之一的好友,著名荷蘭華裔時裝設計師Angelle Chang撐場。

Photography : Jay Tang

6

三人雖然都是首次行Fashion Show,但為慈善都一口應允。原來,行天橋更是Deborah由細到大的夢想:「十幾歲時已經好鍾意睇Catwalk,覺得佢哋真係好型!無奈自己又無175cm,唯有希望有朝一日會成為被邀之列。今次幫Angelle行騷唔止可以做善事,更加係我嘅夢想之旅,絕對開心又興奮!」

7

Deborah為這次Fashion Show不惜挨飢抵餓,之前發燒兩次已消瘦不少的她再狂做運動,開Show當日更只敢分兩次共2/3塊消化餅來頂肚餓,但她坦言無比值得:「為這次Fashion Show 真的瘦了十磅,但能夠實現夢想比一切都珍貴!Angelle話嚟緊會再喺香港搞多次Fashion Show,仲話已經預埋我,聽到真係超開心!希望呢個兒時夢想可以一直延續落去啦!」

3

何俊軒為今次演出亦努力操Fit自己,但操Fit期間又接到新劇角色,在行Show操Fit與上鏡好看之間內心掙扎不斷,過咗三個月掙扎矛盾與堅持互相拉鋸的懊惱生活。「為行Show要減肥,為角色要增磅,偏偏我係一個好鍾意食嘢嘅人,行Show前只不過食多少少,內心竟然充滿以前從未有過嘅罪惡感,內心嘅糾結都咪話唔痛苦。」軒仔最後仍減接近十磅,雖然身型未至完美,幸好Angelle為他量身訂造的西裝款式本就帶點點寬鬆感,加上扣紐演繹,效果大家非常滿意。問道軒仔對是次行Show的感受,他直言:「我都係第一次著以咁明確格仔設計嘅西裝,連我自己都覺得好型仔!只可惜行Show過程完成得太快,我實在仲未享受夠行Catwalk嘅感覺。」

4

軒仔笑言一完Show立刻趕去食他最愛的加底咖哩飯,連受訪期間他也是攬住一大包朱古力與小編邊食邊傾,他說:「之前拍《飛虎2》狂減廿磅,將自己操得太瘦,塊面凹到連同事都以為我有病,所以呢兩年一直都好努力地希望可以將自己谷返肥少少,點知谷極唔肥,都唔知係咪體質問題搞到我操Fit容易增肥難,有時都真係覺得幾無奈!」軒仔表示3月尾4月頭會去越南拍攝新劇《致命復活》,劇中飾演一個精通多國語言的越南華僑,軒仔笑言這一個有趣的新嘗試:「呢個角色對我嚟講絕對係一個新挑戰,劇中除咗廣東話,我仲要精通國語、越南話、閩南話等不同語言,所以宜家已經好努力咁學緊呢幾種外語。」

2

一哥布偉傑形容這次行Show是非常難忘的經驗:「好開心可以參與今次咁有意義嘅慈善活動,當日Angelle邀請我嘅時候,知道係為兔唇兒童籌款,我真係諗都無諗就即刻應承。我一向都好支持慈善活動,亦好樂於參與,既幫到人,自己又開心,何樂而不為。」一哥坦言這次籌款活動對他來說非常有紀念性,所以女朋友亦特意前來給予支持,更為他拍下不少照片。聊到照片,一哥想了一會,笑說:「係喎!你唔提我都唔醒起,當日只係顧住行好呢場Show,宜家先記得當日無同過女朋友合照!唉吔……」雖無合照,但女朋友在場,已經是最窩心的事。

11

三人對Angelle都非常欣賞及佩服,並為她的成功而高興。尤其Deborah及何俊軒,更以Angelle這好朋友為傲。「Angelle本是頗負盛名的國際級Model,佢之所以會成為Fashion Designer全係因為佢兒子天生兔唇,為咗幫兒子建立自信覺得自己係Perfect嘅,Angelle開始親自為兒子設計及縫製出一套又一套獨一無二嘅童裝,再將餘下布枓為自己縫製出與兒子搭配的母子裝。這樣的不經意漸漸獲外界注意,最後更於一個為荷蘭公主設計服飾嘅比賽中奪冠,成績驕人!」軒仔和Deborah對Angelle為兒子所作的一切付出都表示非常感動,都說Angelle是一位非常偉大的母親,只要將來Angelle有用得著兩人的地方,兩人都絕對義不容辭。

浩楠

Stars-hk 創辦人, 希望建立一個只談專業, 不談八卦的娛樂資訊網站。