[音樂] C AllStar為拍新碟「生於斯」 清晨旺角穿梭馬路來回幾十次

今年是4人男子組合C AllStar成軍6周年，來自不同大專歌唱比賽，四個都是冠軍級，成軍後以街頭表演吸人氣和經驗，成功打響名堂，由旺角街頭唱到紅館大舞台，為紀念這個動人時光，推出的新碟「生於斯」特別選在旺角街頭影封面留紀念。

拍攝當日C AllStar天未光已整裝待發，清晨六時旺角集合，趁人潮未現就拍街景，四子在攝影師指示下穿梭馬路兩旁，來回走了幾十次，一時扮正經一時要活潑，部份成員還未睡醒打亂腳步，百厭星陳健安 (安仔) 搞事，要正經時竟然突襲身後的吳崇銘 (阿King)，連累隨後梁釗峰和何建曦 (Jase) 幾乎撞埋一堆，攝影師更瞓身趴在地上取景。

事後安仔坦言求學時期與同學仔唱通宵K之後，試過逛天濛光的旺角街頭，與晨運客擦身而過。不過釗峰就第一次，他說：「我平生首次咋，聽講旺角係『健力士世界紀錄大全』全球人口密度最高既地區，第一次踏足無乜人既旺角，感覺好奇妙。」Jase笑言C AllStar近年與「馬路」好有緣，之前拍《上車咒》MV走勻全港十幾條馬路，又唱又跳，今次為影封面來回馬路幾十次，King笑說：「上次我哋四個面貼咗符咒，嚇襯唔少途人，今次見到樣都嚇襯唔少晨運客。」旺角都有晨運客?King說：「好多晨運客一早就推住架車……」Jase笑說：「嗰啲唔係晨運客，人地推住架車開工呀!」四子大笑，果然未瞓醒。