雨僑、陳詩慧演出《追夢者MUSIC LIVE 2015》 為達到目標堅持夢想

雨僑 (Ava) 和陳詩慧 (Eva) 日前在九龍灣一間琴行參與《追夢者MUSIC LIVE 2015》，帶領幾位樂壇新人一齊演出。以師姐身份出現的Ava 和Eva，入行之初當然都有夢想，不過當年Ava 的夢想還未實現已被賤踏，但她夠毅力撐住，今時今日，最少都成為一個知名Youtuber 及開設自家美容產品做老闆娘。

雨僑表示：「嗰日係同一班都希望做歌手出碟嘅樂壇新人分享心得，佢哋話細個上網，睇我自彈自唱嘅片大，真係嚇死人，哈哈。其實我有掙扎過唔再做網上嘢，因為好孤軍作戰，但時至今日已經不可分割，我好proud of 自己係第一個將唱歌、美容、生活等等呢啲嘢連埋晒一齊拍片嘅人。曾經有一段時間，有啲人覺得你好不知所謂，唔知你喺度做乜，自己屋企唱歌都擺上網，令到自己歌手身份冇晒價值，摧毀緊呢行，但而家每個人都有部靚相機，每個人都有blog，每個人都係blogger，大家都將自己嘅生活記錄，但鼓勵到人、有建設性同有內涵啲嘅就會比較受歡迎。」

其實近期Ava 已減少拍網片，主要是她的美容生意已上軌道，其次是她忙於練習跑步，為明年一月的渣打馬拉松半碼賽作準備，反之與不少運動品牌合作。「我本身身體好弱，冇做運動，估唔到跑步賽事係一個又一個接落去，參加埋半碼，都已經賺突。」

至於在本周五 (4號) 出碟的Eva，足足相隔了七年才再次夢想成真，她笑說：「我都算係追夢表表者，等咗七年再出碟，真係要堅持先達到目標。諗番之前，追夢都花咗好多時間，咁又七年啦，但再出碟起碼俾到自己一個交代，同埋都比以前舒服咗，因為公司都俾到好嘅待遇我。」