「14巴港男」放監袋兩皮 Coffee送唇印祝放監

改篇自高登神作三部曲最終篇的壓軸話題猛片《壹獄壹世界‧高登闊少踎監日記》昨日上畫，電影公司為配合宣傳而特別炮製的「實況踎監體驗有錢派」流動水飯房囚車，亦湊巧於昨日完滿結束，最後一位參賽者「14巴港男」趙詠明成功挑戰踎監7日，贏得二萬元獎金，其孖生兄長更到場迎接細佬「出冊」。

《壹》片女演員林芊妤(Coffee)特別到場出席放監儀式，趙詠明除了檻火盤及被Coffee以碌柚葉拍頭外，Coffee更送對方一張印有唇印的祝福卡，希望對方有美好人生。Coffee表示，以前都有看過趙詠明被前女友兜巴星的短片，「佢一定好愛佢女朋友，因為呢個男仔跪喺度俾女仔打14巴，如果有男仔可以俾我摑14巴，我覺得可以同佢一齊，同埋值得原諒。」她又稱自己不會打男友，但會咬：「我成日咬到我啲男朋友瘀晒，開心唔開心都會咬佢，肉緊吖嘛。」

單身的Coffee被問到會否考慮趙詠明？她笑說：「佢都係一個好男仔，要了解吓先，我又唔係以貌取人，可能我同佢食過餐飯了解過覺得適合我呢，冇人知架，我都祝福佢。」她覺得坐過監都可以做男朋友，唯獨不喜歡紋身漢。

趙詠明成功取得二萬大元，揚言會請家人食飯，他更豪氣地向在場記者說：「請埋你哋囉，錢之嘛！」其孖生兄長與他如同餅印，所以不時被點錯相，趙詠明卻說：「冇問題，食得鹹魚抵得渴，一家人冇計較！」