鄭秀文第三場演唱會 向Eason點唱 (附圖輯)

IMG_ (12)

「Touch Mi鄭秀文世界巡迴演唱會」合共12場跨年演唱會,昨晚(22日)假紅館舉行第三場演唱會,全場座無虛席,鄭秀文(Sammi)與VIP席上的徐濠縈與甘比、周美欣、表演嘉賓陳奕迅、C AllStar、MC仁、24味和Masta Mic,還有全場1萬2千名歌迷齊齊做冬。昨晚換了3款新造型的Sammi台上自爆體重最新數字,又與觀眾互動講笑,非常風騷。

IMG_ (10)

甫開場Sammi一口氣唱了《Bang Bang Bang》、《螢光粉紅》和《煞科》後,穿上閃閃斗蓬後笑說:「今朝9點起身,望到我間總統套房有個磅,心諗:我都好耐冇上磅囉喎!(台下觀眾大叫「幾磅?」)關你咩事?哈哈,其實我會自爆。你哋估吓先啦,我165cm,幾磅呢?」台下觀眾大叫不同磅數,Sammi終於揭曉:「99磅!你哋話呀,我可以為一個演唱會去到幾盡呢?!(向第一行觀眾笑說)所以你哋用6980蚊炒張飛返嚟係值得架!」全場笑聲。

IMG_ (5)

昨晚Sammi在第三個環節,換上Jean Louis Sabaji白色長裙,戴上House of Malakai羽毛和金屬頭飾,在半空唱《放不低》,唱完吊架順利降落地面,問觀眾靚不靚,全場大叫[靚]她笑不攏咀。

IMG_ (7)

之後她在唱電影歌曲環節時亦換了另一套新造型,穿上Schiaparelli Couture粉紅色大褸唱著《問我》、《為何又是這樣錯》、《玻璃鞋》、《終身美麗》和《長恨歌》,當她唱《輸得漂亮》期間,特別表演嘉賓陳奕迅(Eason),穿上同樣粉紅色的服裝拿著一束鮮花出場,全場哄動尖叫。他送上鮮花後與Sammi擁抱,他說:「我今日專登去花店買,我覺得好襯你。我一直喺台下聽你唱歌,真係好好聽!」

IMG_ (9)

Sammi台上爆料,大約2年前他們前後腳出席城都某個頒獎禮後,凌晨四時接到Eason電話,討論歌唱技巧,她親身領教「吹神」威力,Sammi笑說:「凌晨4點,我已經瞓咗覺,佢同我分享唱歌心得,仲指導我唱歌。你呢可以咁咁咁,又可以用另一個方式咁咁咁,咁咗成粒鐘之後,我帶住好眼瞓和同感恩既心情繼續瞓!」Eason立即尷尬地笑,說:「主會原諒我既,所以我先至會咁大膽去騷擾你。其實我跟住有打畀安仔,嘈埋佢,又講咗成個鐘,不過係第二日下午12點!」全場爆笑。之後Sammi幫Eason講番句公道說話:「其實Eason對唱歌真係好有熱誠!」

昨晚Sammi向Eason點唱《歲月如歌》,Sammi說:「Eason好好,佢話:『你想聽咩歌?我唱畀你聽!』我係有私心,所以點唱《歲月如歌》,呢首歌係我明年上映既電影《衝上雲霄》主題曲。」Eason說:「我睇咗條trailer(預告片),好好睇,睇到秀文晶瑩剔透既眼淚,好靚,仲要喺英國拍攝。」Sammi笑說:「好彩導演冇要我唱主題曲,否則真係畀人鬧死。(Eason話:你都有唱!)我喺戲裏面係演rock and roll star,戲裏面唱一首歌,係插曲。但主題曲,交返畀你啦!希望你現場演繹畀我聽。」觀眾報以熱烈掌聲,還全場大合唱,場面震憾。

IMG_ (14)

在Encore環節,Sammi穿上Ellery喇叭褲,和印了演唱會大頭Touch Mi的小背心再度出場,橙色卷髮非常搶眼,她與歌迷大合唱<捨不得你>等經典金曲。

IMG_ (6)

IMG_ (1)

IMG_ (2)

IMG_ (3)

IMG_ (15)

IMG_ (16)

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。