「教姐」、愛寵Amber參加《Anson Lo Charity Pet Walk》 近四千神徒齊創造世界紀錄

盧瀚霆國際後援會為慶祝Anson Lo生日，於7月5日舉辦重磅生日活動「Anson Lo Charity Pet Walk」，吸引近4千名神徒參與，同日更創造「最大規模狗狗掌印展示」世界紀錄，共收集1008狗隻掌印！

參與活動的神徒攜同愛犬參與，呢日活動除了慈善步行籌款活動，場內更有多個打卡位、遊戲及小食攤位，當中亦邀請受惠慈善機構設立攤位，寄望大眾能關注本港不同界別有需要的人士和動物。神徒接受訪問時表示開心與「教主愛寵」Amber互動：「因為教主都好鍾意寵物，希望透過今次活動可以帶出領養嘅重要信息！希望一陣我啲狗狗可以同『Amber』一齊玩得開心啲，亦希望教主感受到我地嘅心意。」

呢日「教姐」Sharon （Anson Lo家姐）與Amber出席活動，並主持起步嗚槍活動，眾多神徒爭相與Amber影相，成為會場「限定打卡點」，場面相當搞笑！Sharon表示感謝神徒為教主慶祝生日，盼樂迷繼續為社會弱勢社群付出：「多謝大家愛錫細佬，好開心參與呢日嘅活動！平時Amber都好珍惜同Anson相處嘅時光，因為細佬未必可以日日都陪住佢，早前細佬休養期間，Amber都成為細佬嘅精神支持，成日痴住細佬。平時同Amber落樓散步時，見到細佬啲廣告都會話比Amber知呢個係『哥哥』，不過佢都好似唔太認得咁。」Sharon透露Anson Lo 曾考慮帶同Amber 跑步，但擔心運動量太大所以放棄。