「醫科生全能唱作新人」梁煒謙Vince新歌《夜雪》發佈會 跟黃翊互送禮物正式拜師 前輩蔣嘉瑩大讚超強實力

2025年樂壇新人梁煒謙（Vince），本身是醫學院生物醫學的學生，兼且識得彈結他、口琴和創作音樂，Vince既讀到書又有音樂才華，以全能姿態推出首支單曲《夜雪》。今日（5月19日）舉行首個發佈會，Vince好開心能夠舉行首個大型活動，「真的沒想過有一日可以夢想成真，能夠成為歌手，我覺得好窩心，可以得到師父黃翊、蔣嘉瑩和艾力的支持，非常感恩，希望大家接受我呢個樂壇新丁。」

實力才華兼備超新星
Vince在發佈會上即場演繹有份參與填詞新歌《夜雪》外，再唱出《黑洞》和《遙吻》，「好興奮可以在記者朋友面前唱歌，俾大家聽到及認識我的聲音。」Vince好希望可以成為唱作人，繼《夜雪》親自填詞後，已計劃推出第二首單曲，將會一手包辦曲詞，「 希望每首歌自己都可以有份參與，監製有一個特訓，要求我一個星期要交一首Demo，目前完成了20首歌，希望我可以keep住推出個人作品，去到不同舞台唱歌，只要有一個人願意聽我的音樂，我都會繼續唱。」

感恩有師父黃翊出現
4歲開始學口琴的Vince，還邀請師父黃翊跟他同台合唱《最愛的你》，更以口琴來伴奏，「發佈會舉行時非常緊張，幸好有師父在隔離，好似派了粒定心丸給我。」為了答謝「黃師父」照顧，Vince花了一星期時間親自畫了素描送給對方，而黃翊亦送了藍芽卡拉OK咪鼓勵，Vince更即場拜師問黃翊，「我可唔可以叫聲你師父呀？」黃翊開心答應，「梗係好啦！以後生生性性，要努力唱好歌啦！」聽到師父這樣講，Vince即感動得流下男兒淚，場面感人。

Vince跟黃翊在疫情期間認識，之後一見如故，在黃翊悉心指導和安排下，有機會圓夢踏入樂壇，「我同師父的淵源，要講到疫情期間的《Very Cool Live》音樂節目，當時我做舞台劇的表姐小龍帶我去，之後師父給了我很多鼓勵和動力，有一次他表演亦叫我上台一齊唱，還介紹監製Dominic給我認識，直到我收到第一首Demo，他和蔣嘉瑩都有鼓勵我派台，同時又好似爸爸一樣，照顧我在音樂工作和學業上的平衡，真的很感謝他的出現。」這次音樂上的結緣，還讓Vince多了個暱稱「表弟」，「由於是表姐帶我認識師父、蔣嘉瑩和Live現場一班樂手，他們都會跟我表姐一樣叫我『表弟』，我好鍾意這個名好親切，歡迎大家都這樣稱呼我。」

黃翊蔣嘉瑩即場力撐
黃翊在《Very Cool Live》認識「表弟」時，「表弟」還未夠20歲，已令他留下深刻印象，「當時他已經唱得有板有眼，仲好似耍雜技一樣，邊唱歌邊吹口琴和彈結他，最難得他不是只識唱近年的歌，估不到連80、90年代的歌一樣識得唱。」黃翊加深對「表弟」認識後，覺得他人品不錯，決定好好培養，「佢好正面好單純，年紀又同我個仔差唔多，但我個仔去咗美國讀書，我就做『黃師父』當佢好似我個仔咁湊，將啲父愛畀晒佢，同埋自己都做過新人，當日都好希望有人提攜，現在見到佢對音樂咁有熱誠，幫到就盡力幫啦！」蔣嘉瑩亦讚「表弟」是難得的人才，「他唱新舊歌都一樣咁好，同埋為人又乖仔，我覺得好值得幫。」.