羅力威學做煮飯公 雨僑疫世陀B三個月

雨僑 (Ava) 和羅力威結婚兩年,今日二人正式宣佈走進人生新階段,將會由二人世界變成三人家庭。今日情人節,Ava 在 Facebook 公佈喜訊:「祝各位情人節快樂!兒女是耶和華所賜的產業;所懷的胎是祂所給的賞賜。(詩127: 3) 感謝主賜給我們這個寶貴的小生命 不知道你會比較像爸爸還是媽媽呢?」她並上載了和丈夫的童年照,另一張則是二人近期合照,相當sweet。

Ava 現已陀B三個月,身體適應上還算ok,只有輕微不適,但口味就有變化,變成無酸不歡,她說:「頭三個月都會有少少唔舒服,突然間喺 salon 洗完頭起身好暈,嚇死我….以為咩事,不過唔嚴重,我知道冇嘔都唔算咩辛苦,食嘢就麻煩少少,日日唔同口味,但主要都係酸嘢就開心啲。」

由於口味變,所以 Ava 在這段日子內並沒特別進補,「花膠呀雞湯呀啲 heavy 嘢,全部都令我好反胃,所以無乜進補,現階段 BB size ok,我唔諗住催谷佢啦!都係正常三餐,好間唔時飲吓滴雞精。」至於生仔女生女,Ava 表示無所謂,而她稍後才公佈 BB 性別。

羅力威和 Ava 首次做爹哋媽咪,愛妻號阿威當然緊張,除了開工外都陪實太太,不過因為疫情問題,其實兩人都甚少出門,Ava 說:「呢段時間都無乜出過街,依家更加少,都係檢查先出去診所,口罩眼鏡洗手都基本,老公會戴手套負責㩒開門等等;同之前最大分別係我老公依家煮飯,佢真係完全唔識嘅,我啲師奶教人煮飯係斷估㗎嘛,啲份量、次序講到唔清唔楚,結果都係自己受番,不過佢好努力,進步咗好多,依家都唔差。」

過去一個月疫症肆虐,Ava 會形容是一種挑戰,「其實呢大半年唔止對懷孕嚟講係挑戰,香港人要好好生活本身就係一個挑戰,加上疫情,係會多少少擔心,但係做媽媽嘅幾時都擔心㗎啦,經歷咁多再迎接小生命,除咗好想俾佢一個快樂嘅童年,我更加懂得將來要教佢做一個正直、善良、堅強嘅人。」暫時 Ava 大多時間留家養胎,湊巧她主演的《性敢中環》在viu播出,可以煲劇睇戲多個娛樂選擇。

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。