側田「繼續命硬演唱會」除帽掀起全場高潮 (附圖輯及流程)

側田於今年5月舉行的「命硬演唱會2013」反應熱烈,火速宣布添食,前晚在紅館舉行Part2「繼續命硬演唱會」,全場爆滿,父母、韓籍女友和妹妹等「家人」專程來港打氣。「草蜢」的蘇志威、組合C AllStar、歌手彭永琛和著名主持人李浩林等台下捧場。

記者: Nicole

全晚側田心情勁high,一時感觸眼濕濕,一時除帽露光頭!演唱會晚上八時半由側田以成名作《好人》、《三十日》和《Kong》打頭陣。未知是否因陳奕迅早前在個唱訓斥觀眾睇騷掛住影相,前晚台下觀眾都非常專心,側田唱完歌才舉機拍照,他說:「你哋剛才咁乖專心聽我歌無影相,我依家擺甫士畀你哋影啦!」然後作狀唱歌擺甫士,表情肉緊,非常搞笑!之後他唱《美麗之最》和《我不是好人》,有感而發:「12年前我開始寫歌,嗰陣無人要我啲歌,我開始好唔開心,儲埋好多負能量。多謝你哋(觀眾)畀我好多正能量,改變咗我,能量呢啲嘢真係可以傳染。雖然我依家仲未去晒正能量嗰邊,仲有隻腳喺負面想法嗰度,但我會繼續努力,跳晒過去正能量嗰邊!」

唱完《情歌》、《傷追人》和《感動》後,側田又感觸地說:「呢3年去咗北京生活,體會幸福唔係必然,無論事業、家庭和愛情都係要自己爭取,回想10年前既我,以為自己有少少才華就大晒,以為自己擁有一切。依家成長咗,我會努力學習謙虛啲,少說話多做事,唔好怕蝕底。」觀眾報以掌聲鼓勵,他續說:「講講吓,自己都有啲眼濕濕!」接著他介紹其三叔、著名音樂人Ted Lo出場,為他鋼琴伴奏《Yesterday》和國語歌《可惜不是你》。而側田除了表演結他自彈自唱《BOK》和《Saranghae》(韓語意思:我愛你),他與觀眾玩Vocal Effect一齊jam歌《決戰二世祖》,還有與靚聲組合5PM以多重唱表演《大雄》和英文歌《Crazy Love》,而向張國榮致敬環節亦有保留,他以「哥哥腔」唱《風繼續吹》、《追》和《當年情》,全場掌聲拍和。在一輪感性場面後,在「安哥」環節側田為演唱會換個氣氛,他穿上全身粉紅色西裝出場演唱新歌《爽》,除了扭籮跳舞,他更當住觀眾席上的女朋友面前,打拍穿迷你裙的女舞蹈員pat pat,觀眾興奮尖叫。而唱到最後一曲《命硬》時,他更索性除帽露光頭,全場站立歡呼,掀起高潮。他自摸光頭,笑說:「你哋(觀眾)睇我光頭,仲興奮過聽我唱歌喎!」

演唱會圓滿結束後舉行開香檳祝捷儀式,側田接受訪問時透露,媽咪和女友剛才聽他唱出特別寫給她們的《兩個女人》時感動到喊,他說:「我自己試過被歌詞感動到喊,但今次連媽咪同女友都喊係第一次,好開心終於打動到佢哋!因為女友唔識聽廣東話,所以平時佢唔明白我唱咩,但今次現場大銀幕,可以一邊聽一邊睇到歌詞就好感動。」他透露女友懂唱歌和作曲,還自爆最初被她的歌聲吸引,稍後他更會選用女友作的歌。

至於側田媽咪專程從美國來港捧場,側田說:「家人都分布世界各地,平時好少全家齊人食飯,今次因為我開騷就集合晒大家,媽咪更會留港一星期,我可以陪佢多啲!」至於台上騷光頭,側田表示沒想過觀眾反應如此熱烈,他笑說:「我係咪好似會唱歌既麥嘉?下次不如舉行《側田光頭騷》呀!(以後光頭示人?)剛才只係太熱,戴帽真係好焗。其實台上表演還OK,但台下都係繼續戴帽較有安全感!」

演唱會之流程如下:
1.好人
2.三十日
3.Kong
4.美麗之最
5.我不是好人
6.傷追人
7.情歌
8.感動
9.決戰二世祖
10.紅地氈
11.Erica
12.Yesterday
13.可惜不是你
14.大雄(與5PM合唱)
15.Crazy Love(與5PM合唱)
16.Volar
17.未輸
18.風繼續吹
19.追
20.當年情
21.兩個女人
22.Medley:愛我別走+海闊天空
23.B.O.K
24.Saranghae
25.情永落
26.我有今日
27.運
Encore:
1.爽
2.男人KTV
3.很想很想說再見
4.命硬

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。