楊千嬅喜為新歌《好不容易遇見愛》拍MV 好友陳慧琳助陣 (附圖輯)

楊千嬅明年1月「Let’s Begin演唱會2015」近日第二度宣布加場,一口氣加開1月30及31號兩場,合共7場。正籌備演唱會的千嬅,日前為新歌《好不容易遇見愛》拍攝MV,隆重其事,她更親自邀請好朋友陳慧琳(Kelly) 特別演出。兩位潮媽天后聚頭立即雞啄唔斷,又講扮靚又講湊仔經,導演嗌cut都幾乎聽唔到,原來她們有一段「掃地情緣」,令人回味!

緣份的確奇妙,千嬅與嘉賓陳慧琳(Kelly)同期出道,相識接近20年,雖然工作上合作不多,但每次見總有說不完的話題,今次為配合MV內容,千嬅很想找一位有特別感情的朋友參與,立即想到Kelly。千嬅說:「多謝Kelly爽快答應,因為之前我忙住宣傳,工作調動,MV又突然提早咗拍,搞到好趕去約,但我真係好想請到Kelly,結果佢非常爽快答應。其實邀請Kelly 係一個情義結,今次呢首歌係《姊妹》既延續篇,叫做《好不容易遇見愛》,係講人生遇到好多人,會有段時間成日見,之後又突然相隔好耐都唔見,並唔係發咗啲乜嘢問題,只係各有自己生活要去行前。呢首歌就係想講呢啲感覺和回憶,珍惜大家既緣份。」現場,千嬅送了一個咕0臣畀Kelly,然後她們一人攬住一個咕0臣傾偈,就好像小女孩傾心事一樣,好有心思,物輕情義重。

2000年千嬅首個紅館演唱會,當時已經邀請Kelly做第一位出場嘉賓,她說:「點解我今次MV邀請Kelly呢?其實佢係我人生第一個紅館演唱會既嘉賓,更加係第一場嘉賓,仲要係第一個出場,比我更早出場既嘉賓。」Kelly碌大雙眼,驚訝地說:「係咩?」千嬅續說:「你仲幫我掃地掃咗半個鐘添!」14年前的回憶終於返埋嚟,Kelly哈哈大笑說:「係呀,我記得啦!咁你要幫我拖地!」千嬅豪氣地說:「好呀!我幫你個仔間房拖地都得架!」她又笑說,當年第一次開演唱會,希望令觀眾驚喜,於是她膽粗粗邀請Kelly做嘉賓,而且要她開騷前在台上掃地,果然引起話題,成為經典!Kelly笑說:「其實叫我上台掃地唔驚,叫我上台彈琴驚啲!」

Kelly為了千嬅在紅館掃地都得,拍MV當然無問題,但原來她埋位前曾有少少心理障礙,Kelly說:「我嚟之前有少少驚,因為最初收到消息我要喺鏡頭前同你嗌交,仲要鬧到你喊住走,同你點嗌交?!」千嬅笑言一場誤會,她說:「其實係那些年既我同Kelly嗌交,我著唔返校服架啦,所以呢部份唔使我哋去演繹!」鏡頭前後,Kelly和千嬅傾到雞啄唔斷,導演嗌cut都唔知,就好似攬住枕頭Pillow Talk傾通宵的少女。Kelly笑說:「我哋唔係成日見面,但一見到面就bla bla bla講唔完!」已經有兩個囝囝既Kelly果然經驗特別豐富,千嬅成功向她討教:「Kelly教咗我兩招餵囝囝食嘢既方法,今晚返去試!」Kelly扮得戚地說:「過兩招,唔多,少少就夠!」

浩楠

浩楠

Stars-hk 創辦人, 希望建立一個只談專業, 不談八卦的娛樂資訊網站。