[K韓公社]韓影意聞錄—–<虛擬都市>

好開心又收到電影商既邀請搶先睇呢套aki留意左好耐,由池昌旭、沈恩敬、安宰弘主演既電影<虛擬都市>!有昌旭OPPA當然一定要捧場啦!而呢套犯罪動作電影會係4月6日隆重上映,今次呢套真係睇到全場都嘩嘩聲呀!

有留意既都知道,池昌旭就黎要入伍啦T^T但佢都好識做,4月9日除左會黎香港搞見面會之外,呢部佢主演既電影都會係見面會之前上映!4月真係池昌旭月呀!講反套戲先,劇情係講一個打機達人,係一次將電話交比失主之後,一夜之間就變左姦殺犯。不論鏡頭、畫面、特技、排場、動作,完全睇到導演既另類表現手法!用左好多好靚既視覺效果去表達唔同既情節,同以前睇開既真係好唔同!全場都睇到:「嘩~~嘩~~」

昌旭OPPA既演技可以話係爐火純青,要型要可愛要酷要玩要認真要喊要笑,真正既要乜有乜!動作演員呢個身份都好似同佢劃上左等號,睇佢既武打真係一種享受,佢亦為左呢套戲接受左從影以來最嚴格既訓練!一開場既虛擬世界激戰場面,真係型到喊出黎!個畫面更係靚到小妹驚嘆左一聲!而當中令我最深刻既打鬥埸面,係昌旭OPPA熄左間屋既燈,係全黑既環境掉珠仔去聽聲打人既一幕,連身旁友人都忍唔住話:「導演既諗法同表達方法好創新!」

而令我地最驚嘆既,當然係戲中既超高科技!不論係沈恩敬既家、奸角既家,仲有池昌旭隊友們既技能、殺人團隊既技術同頭腦,個啲智能科技,真係勁到離哂地!好多人都會忍唔住話:「有冇咁勁呀?!」,但戲唔係就係想將不可能既野變有可能咩?戲劇世界既魔力,就係你想既都可以係戲到做到!有時睇戲,唔使咁理智既~好好享受一下「不可能」,都幾好呀~

但有小小遺憾係唔係太睇到沈恩敬個靚樣,因為佢飾演既係一位拒絕同外界接觸既駭客,唔會同人直接溝通,面對面都要用電話,長期都用頭髮遮住個樣,所以真係好難睇得清!但亦因為咁,為比較黑暗又沈重既電影情節添上唔少笑聲!

呢套<虛擬都市>可謂昌旭OPPA臨入伍前既最後之作!係真.粉絲既你到時識做喇!

 

 

Aki C

大家好!我叫Aki呀!雖然個名好日本,但我都係偽韓人一名,只要係關韓國既野,不論KPOP、韓劇、韓食、韓景點乜乜乜….都關我事架!而我係到都會分享下我同韓星合作過既所見所聞,當然唔少得去韓國玩既趣事啦!希望大家多多指教呀! FACEBOOK: Aki Sakura